തിരുവനന്തപുരം: സംസ്ഥാനത്തു സൗജന്യ ഓണക്കിറ്റ് കിട്ടാനുള്ളത് 90,822 മഞ്ഞ റേഷൻ കാർഡ് ഉടമകൾക്ക്. ഇതിൽ 33,399 പേരും കോട്ടയം ജില്ലയിലാണ്. പുതുപ്പള്ളി ഉപതിരഞ്ഞെടുപ്പു കാരണം വിതരണത്തിന് ജില്ലയിൽ ഏർപ്പെടുത്തിയിരുന്ന വിലക്കു നീക്കിയതു തിങ്കളാഴ്ച വൈകിട്ടാണ്. അതിനാൽ 1210 പേർക്കു മാത്രമേ കോട്ടയത്ത് കിറ്റ് വാങ്ങാനായുള്ളൂ.

വയനാട് ജില്ലയിൽ 7,000 പേരും ഇടുക്കിയിൽ 6,000 പേരും കിറ്റ് കിട്ടാത്തവരുണ്ട്. മറ്റു ജില്ലകളിൽ 2,000 4,000 വരെ പേർ വാങ്ങാനുണ്ട്. കിറ്റ് വിതരണം ഇനി റേഷൻ കടകൾ തുറക്കുന്ന നാളെ ആരംഭിക്കും. മൂന്നു മാസം തുടർച്ചയായി റേഷൻ വിഹിതം വാങ്ങാത്ത ആറായിരത്തിലേറെ മഞ്ഞ കാർഡ് ഉടമകളെ കഴിഞ്ഞ ജൂലൈയിൽ മറ്റു വിഭാഗത്തിലേക്കു മാറ്റിയിരുന്നു. കിറ്റ് വിതരണത്തിന് നിശ്ചിത സമയം തീരുമാനിച്ച് അതിനു ശേഷവും വാങ്ങാത്തവരുടെ കാര്യത്തിൽ ഇത്തരം നടപടികൾ വേണമോയെന്നതു പരിഗണിച്ചേക്കും.