തലയോലപ്പറമ്പ്: ഫുട്‌ബോൾ കളിക്കിടെ മതിലിന്റെ തൂൺ ഇടിഞ്ഞ് ദേഹത്തേക്ക് വീണ് വിദ്യാർത്ഥി മരിച്ചു. തലയോലപ്പറമ്പ് വെട്ടിക്കാട്ടുമുക്ക് കോട്ടപ്പള്ളിയിൽ ഹാരിസിന്റെ മകൻ മുഹമ്മദ് അബൂബക്കർ ഹാരിസ്(13) ആണ് മരിച്ചത്. കളിക്കുന്നതിനിടെ തെറിച്ചു പോയ ബോൾ എടുത്ത് മടങ്ങവെ മതിലിടിഞ്ഞ് ദേഹത്തേക്ക് വീഴുകയായിരുന്നു. വ്യാഴാഴ്ച വൈകീട്ട് 5.30-ന് വെട്ടിക്കാട്ടുമുക്ക് ഹൗസിങ് കോളനിക്ക് സമീപമാണ് സംഭവം.
മൈതാനത്ത് കൂട്ടുകാരുമൊത്ത് ഫുട്‌ബോൾ കളിക്കുകയായിരുന്നു ഹാരിസ്. പന്ത് തെറിച്ച് സ്വകാര്യ വ്യക്തിയുടെ പുരയിടത്തിലേക്ക് പോയി. ഇത് എടുത്ത് തിരികെ വരാനായി മതിലിന്റെ തൂണിൽ പിടിച്ചുകയറുന്നതിനിടെയായിരുന്നു അപകടം. അപകടാവസ്ഥയിലായിരുന്ന മതിലിന്റെ തൂൺ ഇടിഞ്ഞ് മുഹമ്മദിന്റെ ദേഹത്തേക്ക് വീഴുകയായിരുന്നു.
നാട്ടുകാർ അറിയിച്ചതിനെ തുടർന്ന്, സമീപത്ത് പട്രോളിങ് നടത്തിയിരുന്ന തലയോലപ്പറമ്പ് പൊലീസ് സ്ഥലത്തെത്തി കുട്ടിയെ ചെമ്മനാകരിയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും രക്ഷിക്കാനായില്ല.
പുത്തൻകാവ് എസ്.എൻ.ഡി.പി. ഹയർ സെക്കൻഡറി സ്‌കൂളിലെ എട്ടാം ക്ലാസ് വിദ്യാർത്ഥിയാണ്. അമ്മ: റെജീന. സഹോദരി: ആമിന. മൃതദേഹം വൈക്കം താലൂക്ക് ആശുപത്രി മോർച്ചറിയിൽ. കബറടക്കം വെള്ളിയാഴ്ച 12-ന് ചെമ്പ് കാട്ടിക്കുന്ന് ജുമാ മസ്ജിദ് കബറിസ്താനിൽ.
