മലപ്പുറം: പാലക്കാട് കോഴിക്കോട് ഗ്രീൻഫീൽഡ് ദേശീയപാത നിർമ്മാണത്തിനായി ഏറ്റെടുക്കുന്ന സ്ഥലങ്ങളുടെ നഷ്ടപരിഹാര നിർണയം പൂർത്തിയായി. മലപ്പുറം ജില്ലയിൽ 1986.64 കോടി രൂപയാണ് നഷ്ടപരിഹാര തുകയായി നിശ്ചയിച്ചിട്ടുള്ളത്. 15 വില്ലേജുകളിലുള്ള ഭൂവുടമകൾക്കുള്ള നഷ്ടപരിഹാരമാണിത്. 2013ലെ ഭൂമി ഏറ്റെടുക്കൽ നിയമപ്രകാരമാണ് നഷ്ടപരിഹാര നിർണയം നടത്തിയത്. പതിനഞ്ചു വില്ലേജുകളിൽ നിന്നായി 238 ഹെക്ടർ ഭൂമിയാണ് ദേശീയപാത വികസനത്തിനായി ഏറ്റെടുക്കുന്നത്. ഇതിൽ സ്വകാര്യ ഭൂമിയും സർക്കാർ ഭൂമിയും ഉൾപ്പെടും.
ഭൂമി ഏറ്റെടുക്കുന്നത് ദേശീയപാത നിയമം പ്രകാരം ആണെങ്കിലും 2013ലെ ഭൂമി ഏറ്റെടുക്കൽ നിയമപ്രകാരമാണ് നഷ്ടപരിഹാരം നിർണയിച്ചത്. ഭൂമിയുടെ അടിസ്ഥാന വിലയ്ക്കു പുറമേ ഗുണനഘടകവും 100 ശതമാനം സമശ്വാസ പ്രതിഫലവും വിജ്ഞാപന തീയതി മുതൽ അവാർഡ് തീയതി വരെ അടിസ്ഥാന വിലയിന്മേൽ 12 ശതമാനം വാർഷിക നിരക്കിൽ വർദ്ധനവും ഉൾപ്പെടുത്തിയാണ് നഷ്ടപരിഹാര തുക കണക്കാക്കിയത്. ഏറ്റെടുക്കുന്ന ഭൂമിയിലുള്ള മുഴുവൻ നിർമ്മിതികൾ, കാർഷിക വിളകൾ, മരങ്ങൾ എന്നിവക്ക് ബന്ധപ്പെട്ട വകുപ്പുകൾ നിശ്ചയിക്കുന്ന വിലയുടെ ഇരട്ടി തുകയാണ് സമാശ്വാസ പ്രതിഫലം അടക്കം നഷ്ടപരിഹാരമായി അനുവദിക്കുന്നത്.
കാലപ്പഴക്കം പരിഗണിക്കാതെ എല്ലാ നിർമ്മിതികൾക്കും പൊതുമരാമത്ത് വകുപ്പ് കണക്കാക്കുന്ന നിർമ്മാണ ചെലവിന്റെ ഇരട്ടി തുക നഷ്ടപരിഹാരമായി നൽകും. കെട്ടിടാവശിഷ്ടങ്ങൾ ആവശ്യമില്ലാത്തവരിൽ നിന്നും സാൽവേജ് തുക കുറക്കില്ല. പൂർണ്ണ തോതിൽ പണി പൂർത്തിയാക്കിയ (വൈദ്യുതീകരണവും പ്ലംബിങ്ങും ഉൾപ്പെടെ) കോൺക്രീറ്റ് താമസ കെട്ടിടങ്ങൾക്ക് ചതുരശ്ര അടിക്ക് 5059 രൂപയും ഓടിട്ട കെട്ടിടത്തിന് ചതുരശ്ര അടിക്ക് 4300 രൂപയുമാണ് നഷ്ടപരിഹാരമായി കണക്കാക്കിയത്. നഷ്ടപരിഹാരതുകയുടെ അംഗീകാരത്തിനായി ദേശീയപാത അഥോറിറ്റിക്ക് സമർപ്പിച്ചിരുന്നു.
ഇതിൽ എടപ്പറ്റ, കരുവാരക്കുണ്ട്, പോരൂർ, വെട്ടിക്കാട്ടിരി, എളങ്കൂർ, കാരക്കുന്ന് വില്ലേജുകളിലേക്ക് 592 കോടി രൂപയുടെ അനുമതിയായി. ബാക്കി വില്ലേജുകളിൽ ദേശീയപാത അഥോറിറ്റിയുടെ അംഗീകാരം ഓരാഴ്ചയ്ക്കകം ലഭിക്കും. ഈ മാസം ഉടമകൾ ഒഴിഞ്ഞു പോകാനുള്ള നോട്ടീസ് നൽകും. ഇതിന് ശേഷം രണ്ട് മാസത്തിനകം ഒഴിഞ്ഞു പോകേണ്ടി വരും.
പാലക്കാട് മരുതറോഡുമുതൽ കോഴിക്കോട്-ഇരിങ്ങല്ലൂർവരെ 121 കിലോമീറ്റർ നീളമുള്ളതാണ് റോഡ്. മരുതറോഡ്--കരിമ്പ (30.720 കി.മീ), കരിമ്പ--എടത്തനാട്ടുകര (30.720 കി.മീ), എടത്തനാട്ടുകര--കാരക്കുന്ന് (26.490 കി.മീ), കാരക്കുന്ന്--വാഴയൂർ (25.070 കി.മീ), വാഴയൂർ--ഇരിങ്ങല്ലൂർ (8.006 കി.മീ) എന്നീ അഞ്ച് റീച്ചുകളിലാണ് നിർമ്മാണം.
