വനത്തിൽ പെരുമഴ; വിതുര മീന്മുട്ടിയിൽ വെള്ളച്ചാട്ടം കാണാനെത്തി കുടുങ്ങിയ വിനോദസഞ്ചാരികളെ രക്ഷപ്പെടുത്തി

തിരുവനന്തപുരം: തിരുവനന്തപുരം വിതുര കല്ലാർ മീന്മുട്ടിയിൽ കുടുങ്ങിയ വിനോദസഞ്ചാരികളെ രക്ഷപ്പെടുത്തി. ഉൾവനത്തിൽ ശക്തമായ മഴ പെയ്തതോടെ മീന്മുട്ടിക്ക് സമീപം വെള്ളം ഉയർന്നതാണ് സഞ്ചാരികൾ കുടുങ്ങാൻ കാരണം. വൈകിട്ട് നാലുമണിയോടെയാണ് സഞ്ചാരികൾ കുടുങ്ങിയത്. വെള്ളച്ചാട്ടം കാണാനെത്തിയവരാണ് കുടുങ്ങിയത്.

ഇരുപതിലധികം വാഹനങ്ങൾ ഈ സമയം മീന്മുട്ടിയിൽ ഉണ്ടായിരുന്നു. സമീപത്തെ നാട്ടുകാരും ഗാർഡുകളും ചേർന്നാണ് സഞ്ചാരികളെ രക്ഷപ്പെടുത്തിയത്. പൊന്മുടി അടക്കമുള്ള സ്ഥലങ്ങളിൽ രാവിലെ മുതൽ മഴ ഉണ്ടായിരുന്നു.

മീന്മുട്ടി വനത്തിൽ നിന്നും ഒഴുകി വരുന്ന ചെറിയ തോട് കരകവിഞ്ഞൊഴുകിയതോടെയാണ് തോടിന്റെ മറുകരയിൽ നിരവധി വിനോദ സഞ്ചാരികൾ കുടുങ്ങിയത്. സമീപത്തെ നാട്ടുകാരും ഗാർഡുകളും ചേർന്ന് സഞ്ചാരികളെ ഇക്കരെ എത്തിക്കുകയായിരുന്നു.

രാവിലെ മുതൽ പ്രദേശത്ത് ചെറിയതോതിൽ മഴ പെയ്യുന്നുണ്ട്. എന്നാൽ വനത്തിനുള്ളിൽ ശക്തമായ മഴയാണ് പെയ്യുന്നത്. അതാണ് തോട് നിറയാൻ കാരണമായത്. വൈകിട്ട് 4 മണിയോടെയാണ് തോട്ടിൽ വെള്ളം കയറിയത്.