വിൽപ്പനക്കായി കൊണ്ടുവന്ന എംഡിഎംഎയുമായി മൂന്നു യുവാക്കൾ പിടിയിൽ

കൽപ്പറ്റ: വിൽപ്പനക്കായി കൊണ്ടുവന്ന എംഡിഎംഎയുമായി മൂന്ന് യുവാക്കൾ പൊലീസിന്റെ പിടിയിൽ. വെള്ളമുണ്ട സ്വദേശികളായ വരാമ്പറ്റ മൂരികണ്ടിയിൽ മുഹമ്മദ് ഇജാസ് (26), വരാമ്പറ്റ ആലമ്പടിക്കൽ കെ. സാബിത്ത് (24), നാരോക്കടവ് കൊട്ടാരക്കുന്ന് തകടിക്കൽ വീട്ടിൽ ടി.ജി. അമൽജിത്ത് (28) എന്നിവരാണ് പിടിയിലായത്. ഇവരിൽ നിന്നും 37.63 ഗ്രാം എംഡിഎംഎയും കണ്ടെടുത്തതായി പൊലീസ് അറിയിച്ചു.

ജില്ലാ പൊലീസ് മേധാവിയുടെ ലഹരി വിരുദ്ധ സ്‌ക്വാഡും തൊണ്ടർനാട് പൊലീസും ചേർന്നാണ് പ്രതികളെ അറസ്റ്റ് ചെയ്തത്. കോറോം ടൗണിൽ നടത്തിയ പരിശോധനക്കിടെയാണ് പ്രതികളെ പിടികൂടിയത്. ലഹരി വിരുദ്ധ സ്‌ക്വഡിലെ ഉദ്യോഗസ്ഥർക്ക് പുറമെ തൊണ്ടർനാട് സബ് ഇൻസ്പെക്ടർ അജീഷ് കുമാർ, അസി. സബ് ഇൻസ്പെക്ടർ എം.എ. ഷാജി, എസ്.സി.പി.ഒ കല രഞ്ജിത്, സി.പി.ഒമാരായ മുസ്തഫ, റോസമ്മ ഫ്രാൻസിസ് എന്നിവരും പരിശോധന സംഘത്തിൽ ഉണ്ടായിരുന്നു.