കോട്ടയം: വിഖ്യത ചലച്ചിത്രകാരൻ കെ ജി ജോർജിന്റെ വിയോഗത്തെക്കുറിച്ചുള്ള ചോദ്യത്തിന് 'ആളുമാറി' പ്രതികരിച്ച കെപിസിസി അധ്യക്ഷൻ കെ സുധാകരന്റെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്. 'കെ ജി ജോർജ് നല്ലൊരു പൊതുപ്രവർത്തകനും രാഷ്ട്രീയ പ്രവർത്തകനുമായിരുന്നു' എന്നാണ് സുധാകരൻ പ്രതികരിച്ചത്.

അദ്ദേഹത്തിന്റെ വിയോഗത്തിൽ ദുഃഖമുണ്ടെന്നും സുധാകരൻ പ്രതികരിച്ചിരുന്നു. സംഭവത്തിന്റെ വീഡിയോ സോഷ്യൽ മീഡിയയിൽ വ്യാപകമായി പ്രചരിച്ചതോടെ ഏത് ജോർജിനെക്കുറിച്ചാണ് സുധാകരൻ പറയുന്നതെന്നാണ് പലരുടെയും ചോദ്യം. സംഭവത്തിൽ പ്രതികരിച്ച് പിസി ജോർജ് രംഗത്തെത്തി. താൻ ജീവിച്ചിരിപ്പുണ്ടെന്നും താൻ മരിച്ചെന്ന് ആരോ സുധാകരനെ തെറ്റിധരിപ്പിക്കുകയായിരുന്നെന്നാണ് പിസി ജോർജിന്റെ പ്രതികരണം.

പിസി ജോർജ് പറഞ്ഞത്: ''ഞാൻ ജീവിച്ചിരിപ്പുണ്ട്. പ്രിയങ്കരനായ സുധാകരൻ എന്റെ അടുത്ത സുഹൃത്താണ്. അദ്ദേഹത്തെ ആരോ തെറ്റിധരിപ്പിച്ച് ഞാൻ മരിച്ചെന്ന് അറിയിക്കുകയായിരുന്നു. അദ്ദേഹത്തിന്റെ ദുഃഖത്തോടെയുള്ള സംസാരം കേൾക്കാനിടയായി. ഞാനപ്പോൾ പള്ളിയിൽ കുർബാന കണ്ടുകൊണ്ടിരിക്കുകയായിരുന്നു. ആളുകൾ ഓടി വന്ന് എന്നെ വിളിച്ച് പറഞ്ഞപ്പോഴാണ് ഇറങ്ങി വന്നത്. സുധാകരനെ പോലെ മാന്യനായ നേതാവിനെ ഇങ്ങനെ തെറ്റിധരിപ്പിക്കുന്ന വ്യക്തികൾ ശരിയാണോ ഈ ചെയ്യുന്നതെന്ന് ഓർക്കണം. ഞാൻ ജീവിച്ചിരിപ്പുണ്ട്. ഏതായാലും വളരെ നന്ദി. നല്ല മനുഷ്യനാണ് സുധാകരൻ അദ്ദേഹത്തെ തെറ്റിധരിപ്പിക്കരുത്.''

സുധാകരന്റെ വീഡിയോ വൈറലായതോടെ കോൺഗ്രസ് പ്രവർത്തകരും വിശദീകരണവുമായി രംഗത്തെത്തിയിട്ടുണ്ട്. കോൺഗ്രസ് പ്രവർത്തകനായ ഒരു ജോർജ്ജ് ഇന്ന് മരണപ്പെട്ടിരുന്നുവെന്നും കെ സുധാകരനുമായി അടുത്ത ആത്മബന്ധമുണ്ടായിരുന്ന ആ ജോർജിന്റെ മരണത്തെ പറ്റിയാണ് മാധ്യമ പ്രവർത്തകർ ചോദിക്കുന്നത് എന്ന് കരുതിയാണ് സുധാകരൻ അങ്ങനെ പ്രതികരിച്ചതെന്നാണ് കോൺഗ്രസ് പ്രവർത്തകരുടെ വിശദീകരണം. ഈ വിശദീകരണത്തിലും പലരും ചോദ്യം ഉന്നയിക്കുന്നുണ്ട്. ആ ജോർജിന്റെ വിവരങ്ങൾ കൂടി പങ്കുവയ്ക്കണമെന്നാണ് ഇവരുടെ ആവശ്യം. അതേസമയം കെപിസിസി അധ്യക്ഷനോ കോൺഗ്രസ് നേതാക്കളോ ഇക്കാര്യത്തിൽ ഔദ്യോഗികമായ വിശദീകരണം ഒന്നും ഇതുവരെ നടത്തിയിട്ടില്ല.

മറുനാടന്‍ മലയാളി

    മറുനാടന്‍ മലയാളി ബ്യൂറോ