മലപ്പുറം: കപ്പൽ യാത്രയ്ക്കിടെ മലയാളി മർച്ചന്റ് നേവി ഉദ്യോഗസ്ഥനെ കാണാതായതായി പരാതി. മലപ്പുറം നിലമ്പൂർ സ്വദേശി മനേഷ് കേശവദാസിനെയാണ് കാണാതായത്. അബുദാബിയിൽ നിന്നും മലേഷ്യക്കുള്ള യാത്രക്കിടയിലാണ് സംഭവമെന്ന് കപ്പൽ കമ്പനി അധികൃതർ കുടുംബത്തെ അറിയിച്ചു. പുലർച്ചെ നാല് മണിക്ക് ഡ്യൂട്ടി കഴിഞ്ഞ ശേഷം വിശ്രമിക്കാനായി കപ്പലിലിലെ മുറിയിൽ പോയ മനേഷിനെ പിന്നീട് കാണാതായെന്നാണ് കമ്പനി അധികൃതർ പറയുന്നത്.

ലൈബീരിയൻ എണ്ണക്കപ്പലായ എംടി പറ്റ്‌മോസിന്റെ സെക്കന്റ്് ഓഫീസറാണ് മനേഷ്്. അബുദാബിയിലെ ജബൽ ധാനയിൽ നിന്നും മലേഷ്യക്ക് ചരക്കുമായി പോകുന്നതിനിടെ ബുധനാഴ്ചയാണ് മനേഷിനെ കാണാതായത്. കപ്പൽ ഇപ്പോൾ കടലിൽ നങ്കൂരമിട്ട് തെരച്ചിൽ നടത്തുകയാണെന്ന് കമ്പനി അധികൃതർ കുടുംബത്തെ അറിയിച്ചിട്ടുണ്ട്. മനേഷിന്റെ കുടുംബം വിദേശ കാര്യ മന്ത്രാലയത്തിനും കോസ്റ്റ് ഗോർഡിനും പരാതി നൽകി. അവധിക്ക് നാട്ടിലെത്തിയ മനേഷ് ഓഗസ്റ്റ് മൂന്നിനാണ് ജോലിക്കായി മടങ്ങിയത്.