കാഞ്ഞിരപ്പള്ളിയിൽ കാറും ഓട്ടോയും കൂട്ടിയിടിച്ചു; അഞ്ചുപേർക്ക് പരിക്കേറ്റു

കോട്ടയം:  കാഞ്ഞിരപ്പള്ളി കുന്നുംഭാഗം ജനറൽ ആശുപത്രിക്ക് സമീപം കാറും ഓട്ടോയും കൂട്ടിയിടിച്ച് അഞ്ചുപേർക്ക് പരിക്കേറ്റു. ഓട്ടോറിക്ഷ ഡ്രൈവർ മുണ്ടക്കയം 31-ാം മൈൽ സ്വദേശി ഇലവുങ്കൽ ജീസ്, ഓട്ടോറിക്ഷ യാത്രക്കാരായ പാറത്തോട് ഇഞ്ചിയാനി വലക്കാമറ്റം ലാലി, മകൾ റിയ, റിയയുടെ മകൾ ഒരു മാസം പ്രായമുള്ള കുഞ്ഞ്, കാർ ഡ്രൈവർ മുക്കാലി കറ്റുവേലിൽ സാബു എന്നിവർക്കാണ് പരിക്കേറ്റത്.

ദേശീയ പാത 183-ൽ വ്യാഴാഴ്ച ഉച്ചയ്ക്ക് ഒന്നരയോടെയായിരുന്നു സംഭവം. റിയയുടെ മകളെ പൊൻകുന്നം ശാന്തി ആശുപത്രിയിൽ ഡോക്ടറെ കാണിച്ചശേഷം തിരികെ വീട്ടിൽ പോകുംവഴിയാണ് അപകടം നടന്നത്. ഗുരുതരമായി പരിക്കേറ്റ ഓട്ടോറിക്ഷ ഡ്രൈവർ ജീസ്, ലാലി, റിയ, റിയായുടെ മകൾ എന്നിവരെ കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റി