ചേർത്തല: ചേർത്തലയിൽ വെള്ളിയാകുളത്ത് കെഎസ്ആർടിസി ബസും സ്വകാര്യ ബസും കൂട്ടിയിടിച്ചുണ്ടായ അപകടത്തിൽ 20 യാത്രക്കാർക്ക് പരുക്കേറ്റു. ഇന്നലെ വൈകിട്ട് ആറരയോടെയായിരുന്നു അപകടം. ഇടിയുടെ ആഘാതത്തിൽ ഇരു ബസുകളുടെയും മുൻഭാഗം പൂർണമായും തകർന്നു. സ്വകാര്യ ബസ് സമീപത്തെ മതിലിൽ ഇടിച്ചു നിന്നതിനാൽ വലിയ ദുരന്തം ഒഴിവായി.
സ്വകാര്യ ബസ് ഡ്രൈവറുടെ പരുക്ക് ഗുരുതരമാണ്. ചേർത്തലയിൽനിന്നും കോട്ടയത്തേക്ക് പോവുകയായിരുന്ന കെഎസ്ആർടിസി ബസും, കോട്ടയത്തുനിന്ന് ചേർത്തലയിലേക്ക് വരികയായിരുന്ന സ്വകാര്യ ബസും തമ്മിലാണ് കൂട്ടിയിടിച്ചത്. ഇടിയുടെ ആഘാതത്തിൽ ഇരുവാഹനങ്ങളുടേയും മുൻഭാഗം തകർന്നു.
പരുക്കേറ്റവരെ ഉടൻ തന്നെ ചേർത്തല - കോട്ടയം മെഡിക്കൽ കോളജ്, ചേർത്തല താലൂക്ക് ആശുപത്രി, സ്വകാര്യ ആശുപത്രി എന്നിവിടങ്ങളിലേക്ക് മാറ്റി. യാത്രക്കാരെ പ്രദേശവാസികളാണ് ആശുപത്രിയിലെത്തിച്ചത്. അപകടത്തിന് പിന്നാലെ ചേർത്തല തണ്ണീർമുക്കം റോഡിൽ മണിക്കൂറുകൾ നീണ്ട ഗതാഗത തടസമുണ്ടായി.പൊലീസും അഗ്‌നിശമന സേനയും അപകടമുണ്ടായ ഉടൻ സ്ഥലത്തെത്തിയിരുന്നു.
