കളമശേരി സ്‌ഫോടന കേസിൽ വിവാദ പരാമർശം; എം.വി ഗോവിന്ദനെ തള്ളി സീതാറാം യച്ചൂരി

കൊച്ചി:  കളമശേരി സ്‌ഫോടനവുമായി ബന്ധപ്പെട്ടു നടത്തിയ വിവാദ പരാമർശത്തിൽ സിപിഎം സംസ്ഥാന സെക്രട്ടറി എം വി ഗോവിന്ദനെ തള്ളി സീതാറാം യച്ചൂരി. കളമശേരി സ്‌ഫോടനത്തെ പറ്റി കേന്ദ്രകമ്മിറ്റി പറഞ്ഞതാണു പാർട്ടിയുടെ നിലപാട്. എം വി ഗോവിന്ദന്റെ പ്രസ്താവന ഏത് സാഹചര്യത്തിലാണെന്ന് അറിയില്ലെന്നും സീതാറാം യച്ചൂരി പറഞ്ഞു.

സ്‌ഫോടനത്തിനു ഫലസ്തീൻ വിഷയവുമായി ബന്ധമുണ്ടോ എന്നു പരിശോധിക്കണമെന്നും ഭീകരപ്രവർത്തനത്തിന്റെ ഭാഗമാകാം സ്‌ഫോടനമെന്നുമായിരുന്നു എം വി ഗോവിന്ദൻ പറഞ്ഞത്. കേരളം ഫലസ്തീനൊപ്പം പൊരുതുമ്പോൾ ജനശ്രദ്ധ മാറ്റാനുള്ള നിലപാട് ആരുടെ ഭാഗത്തുനിന്നുണ്ടായാലും കർശനമായ നടപടിയുണ്ടാകുമെന്നും എം വി ഗോവിന്ദൻ വ്യക്തമാക്കിയിരുന്നു.