കണ്ണൂർ വിമാനത്താവളത്തിൽ നിന്നും വീണ്ടും കെ എസ് ആർ ടി സി ബസ് സർവീസ്

കണ്ണൂർ: കണ്ണൂർ അന്താരാഷ്ട്ര വിമാനത്താവളത്തിൽ നിന്നും കെ.എസ്.ആർ.ടി.സി ബസ് സർവീസ് ജനുവരിയിൽ പുനരാരംഭിക്കാൻ തീരുമാനമായി. കോവിഡ് ലോക്ഡൗണിന് മുൻപായി കണ്ണൂർ ജില്ലയിലെ പ്രധാന ടൗണുകളിലേക്കും കോഴിക്കോട്, മലപ്പുറംജില്ലകളിലേക്കും സർവീസ് നടത്തിയിരുന്ന കെ. എസ്.ആർ.ടി.സി ബസ് സർവീസുകൾ യാത്രക്കാർ കുറഞ്ഞതോടെയാണ് നിർത്തിയത്.

കൊവിഡിനു ശേഷം 2021- ഫെബ്രുവരി 13-ന് ആരംഭിച്ച കെ. എസ്. ആർ.ടി.സിയുടെ എ.സി ലോഫ്ളോർ സർക്കുലർ ബസ് ഒരുമാസം തികയും മുൻപെയാണ് സർവീസ് അവസാനിപ്പിച്ചത്. യാത്രക്കാർ കുറഞ്ഞതോടെയാണ് സർവീസ് നിർത്താൻ കെ.എസ്.ആർ.ടി.സി.യെ നിർബന്ധിതമാക്കിയത്.

വിമാനത്താവളം വഴി യാത്രചെയ്യുന്നവരുടെ എണ്ണവും നന്നെ കുറവായിരുന്നു.വിമാനത്താവളത്തിൽ ജോലി ചെയ്യുന്ന ജീവനക്കാർക്ക് ഈ ബസ് സർവീസ് ആശ്രയമായിരുന്നു. തലശേരി, കണ്ണൂർ ഡിപ്പോകളിൽ നിന്നും ഓരോബസ് വീതമാണ് സർവീസ് നടത്തിയിരുന്നത്. ലോഫ്ളോർ ബസ് സർവീസ് ആരംഭിക്കുന്നതിന് മുൻപ് വിമാനത്താവളത്തിൽ നിന്നും മട്ടന്നൂർ ടൗൺ, ഇരിട്ടി, കണ്ണൂർ ടൗണുകളെ ബന്ധിപ്പിക്കുന്ന ഏക സർവീസും അവസാനിപ്പിച്ചിരുന്നു.

എയർ ഇന്ത്യാ എക്സ് പ്രസ് സർവീസ്തിരുവനന്തപുരത്തേക്ക് ആരംഭിച്ചതോടെ വിമാനത്താവളത്തിൽ സർവീസുകളും യാത്രക്കാരും വർധിച്ച സാഹചര്യത്തിലാണ് കെ. എസ്. ആർ.ടി.സി ബസ് സർവീസ് വീണ്ടും പുനരാരംഭിക്കാൻ തീരുമാനിച്ചത്. ഇതുവിമാനത്താവളത്തിലറങ്ങുന്ന യാത്രക്കാർക്ക് ചുരുങ്ങിയ ചെലവിൽ യാത്രചെയ്യാൻ സഹായകരമാവുമെന്നാണ് പ്രതീക്ഷിക്കപ്പെടുന്നത്.