മുംബൈ: ഭാര്യയെ കൊല്ലുന്നതിനായി കാൽസ്യം കാപ്‌സ്യൂളുകളിൽ ബ്ലേഡ് കഷണങ്ങൾ നിറച്ച് കഴിപ്പിച്ച ഭർത്താവിനെ് പൊലീസ് അറസ്റ്റ് ചെയ്തു. പുണെ ശിവാനെ നിവാസി സോമനാഥ് സാധു സപ്കൽ (45) എന്നയാളെയാണ് ഉത്തംനഗർ പൊലീസ് അറസ്റ്റ് ചെയ്തത്. ഇയാൾക്കെതിരെ കൊലപാതകശ്രമത്തിനു കേസെടുത്തു.

കുടുംബവഴക്കിനെ തുടർന്ന് ഭാര്യയെ കൊല്ലുന്നതിനായാണ് ക്യാപ്‌സൂളിൽ ബ്ലേഡ് നിറച്ചത്. കഠിനമായ വയറുവേദന അനുഭവപ്പെട്ടതിനെ തുടർന്ന് ആശുപത്രിയിൽ പ്രവേശിപ്പിച്ച യുവതിയെ പരിശോധനകൾക്കു വിധേയയാക്കിയപ്പോഴാണ് കുടലിൽ ബ്ലേഡ് കഷണങ്ങൾ കണ്ടെത്തിയത്. തുടർന്ന് അടിയന്തര ശസ്ത്രക്രിയയിലൂടെ ബ്ലേഡുകൾ നീക്കം ചെയ്യുകയായിരുന്നു.

കുടുംബവഴക്കിനെ തുടർന്നുള്ള വൈരാഗ്യമാണ് ഈ ക്രൂരതയ്ക്കു ഭർത്താവിനെ പ്രേരിപ്പിച്ചതെന്ന് പൊലീസ് പറഞ്ഞു. നാലോ അഞ്ചോ കാൽസ്യം കാപ്‌സ്യൂളുകളിലാണ് ബ്ലേഡ് കഷണങ്ങൾ നിറച്ചതെന്ന് പ്രതി പൊലീസിനോട് സമ്മതിച്ചു.