നവകേരള സദസ് ജനങ്ങളുടെ പരിപാടി; ഇത് ജനങ്ങൾക്കായി സംഘടിപ്പിക്കുക മാത്രമാണ് സർക്കാർ ചെയ്യുന്നതെന്ന് മന്ത്രി പി രാജീവ്

കൊച്ചി: നവകേരള സദസ് ജനങ്ങളുടെ പരിപാടിയാണെന്ന് മന്ത്രി പി. രാജീവ്. ഇത് ജനങ്ങൾക്കായി സംഘടിപ്പിക്കുക മാത്രമാണ് സർക്കാർ ചെയ്യുന്നതെന്നും അദ്ദേഹം പറഞ്ഞു.

സംസ്ഥാനത്തെ എല്ലാ മണ്ഡലങ്ങളിലും നടത്തുന്ന നവ കേരള സദസ് പുതിയ സംഭവമാണ്. ജനങ്ങളിലേക്ക് ഇറങ്ങിച്ചെന്ന് പ്രവർത്തിക്കാനാണ് സർക്കാർ ശ്രമിക്കുന്നത്. ജനങ്ങൾക്ക് അനുകൂലമായ നിരവധി വികസന പ്രവർത്തനങ്ങളാണ് കഴിഞ്ഞകാലങ്ങളിൽ സംസ്ഥാനത്ത് നടപ്പിലാക്കിയിട്ടുള്ളത്.

വിവിധ മേഖലകളിൽ ഡിജിറ്റൽ മികവ് കൈവരിക്കുന്നതിന്റെ ഭാഗമായി നടപ്പിലാക്കിയ ഡിജിറ്റൽ യൂണിവേഴ്സിറ്റി, സയൻസ് പാർക്കുകൾ, ഇൻഡസ്ട്രിയൽ പാർക്ക്, കെ ഫോൺ, ഡിജിറ്റൽ ഹൈവേ, വ്യവസായ മേഖലയുടെ വളർച്ചക്ക് ആവശ്യമായ വിവിധ പദ്ധതികൾ തുടങ്ങി മികച്ച രീതിയിലുള്ള പ്രവർത്തനങ്ങളാണ് സംസ്ഥാന സർക്കാരിന്റെ നേതൃത്വത്തിൽ കേരളത്തിൽ നടപ്പിലാക്കി വരുന്നതെന്നും മന്ത്രി പറഞ്ഞു.