'അവരുടെ പരിപാടി അവർ വിജയിപ്പിക്കട്ടെ'; നവ കേരള സദസ്സിനെതിരെ മലപ്പുറത്ത് പ്രതിഷേധിക്കാനില്ലെന്ന് പി.കെ. കുഞ്ഞാലിക്കുട്ടി

കോഴിക്കോട്: സംസ്ഥാന സർക്കാറിന്റെ നവകേരള സദസ്സിനെതിരെ മലപ്പുറത്ത് പ്രതിഷേധിക്കാനില്ലെന്ന് മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടി. ബഹിഷ്‌കരണം നേരത്തെ പ്രഖ്യാപിച്ചതാണ്. പ്രതിഷേധം നടത്തില്ല. ഞങ്ങളുടെ പരിപാടി പിന്നാലെ വരുന്നുണ്ട്. അവരുടെ പരിപാടി അവരും ഞങ്ങളുടേത് ഞങ്ങളും വിജയിപ്പിക്കും -അദ്ദേഹം പറഞ്ഞു. നവകേരള സദസ്സിനെതിരെ യൂത്ത് കോൺഗ്രസ് പ്രവർത്തകരുടെ കരിങ്കൊടി പ്രതിഷേധത്തിന്റെ പശ്ചാത്തലത്തിലാണ് കുഞ്ഞാലിക്കുട്ടിയുടെ പ്രതികരണം.

''പ്രതിഷേധമില്ല. ഞങ്ങളുടേത് അതിന്റെ പിന്നാലെ വരുന്നില്ലേ. പിന്നെന്ത് പ്രതിഷേധം. അവരുടെ പരിപാടി അവർ വിജയിപ്പിക്കട്ടെ. അതിനെക്കാൾ നന്നാക്കി ഞങ്ങളുടെ പരിപാടി ഞങ്ങൾ നടത്തും. അതല്ലാത്ത പ്രതിഷേധങ്ങളൊന്നും ഇല്ല. പാർട്ടി അതിനൊന്നും അംഗീകാരം കൊടുത്തിട്ടില്ല'' അദ്ദേഹം പറഞ്ഞു.

ഇത്തരം പരിപാടികൾക്ക് ജനം പരപ്രേരണയില്ലാതെ സ്വയം എത്തിച്ചേരേണ്ടതാണ്. സ്‌കൂൾ കുട്ടികളെ നവകേരള സദസിൽ നിർബന്ധമായും പങ്കെടുപ്പിക്കണമെന്ന് പറയുന്നത് ശരിയായ രീതിയല്ല. ഇതിനൊക്കെ മാതൃക മുൻ മുഖ്യമന്ത്രി ഉമ്മൻ ചാണ്ടിയാണ്. ജനസമ്പർക്ക പരിപാടിയിൽ ഒരിക്കലും രാഷ്ട്രീയം പറഞ്ഞിരുന്നില്ല. പരാതികൾ നേരിട്ട് വാങ്ങി അപ്പോൾ തന്നെ തീരുമാനം ഉണ്ടാക്കുമായിരുന്നു. പക്ഷേ അതേപോലെ നടത്താൻ എൽ.ഡി.എഫിനാകുന്നില്ല. മലപ്പുറത്ത് നവ കേരള സദസ്സിനെതിരെ പ്രതിഷേധത്തിന് യുഡിഎഫും ആഹ്വാനം ചെയ്തിട്ടില്ലെന്നും കുഞ്ഞാലിക്കുട്ടി പറഞ്ഞു.