കൊച്ചി: സ്ത്രീധനം തന്നാലെ വിവാഹം കഴിക്കൂ എന്ന പറയുന്നവരോട് താൻ പോടോ എന്ന് പറയാൻ പെൺകുട്ടികൾക്ക് കഴിയണമെന്ന് മുഖ്യമന്ത്രി പിണറായി വിജയൻ. ഇക്കാര്യത്തിൽ സമൂഹത്തിനാകെ നവീകരണം ആവശ്യമാണെന്നും അക്കാര്യത്തിൽ സമൂഹത്തിനും ഉത്തരവാദിത്വം ഉണ്ടെന്നും മുഖ്യമന്ത്രി പറഞ്ഞു.
തിരുവനന്തപുരത്ത് പി.ജി. വിദ്യാർത്ഥിനിയായ യുവതി ആത്മഹത്യ ചെയ്ത സംഭവത്തിലാണ് മുഖ്യമന്ത്രിയുടെ പ്രതികരണം വന്നത്. ഇതിനൊപ്പം നിയമവും ശക്തമാകണമെന്നും സർക്കാർ അക്കാര്യം ചെയ്യുന്നുണ്ടെന്നും പറഞ്ഞു. കൊച്ചിയിൽ നവകേരളസദസ്സിന്റെ ഭാഗമായുള്ള വാർത്താസമ്മേളനത്തിലാണ് പിണറായി വിജയൻ ഇക്കാര്യം പറഞ്ഞത്. മിശ്രവിവാഹവുമായി ബന്ധപ്പെട്ട് നടത്തിയ വിവാദ പരാമർശത്തിൽ സമസ്ത നേതാവ് നാസർ ഫൈസി കൂടത്തായിക്കും മുഖ്യമന്ത്രി മറുപടി പറഞ്ഞു.
ഇഷ്ടപ്പെട്ടവർ വിവാഹം കഴിക്കുമെന്നും എസ്എഫ്ഐ യും ഡിവൈഎഫ്ഐ യും മിശ്രവിവാഹ ബ്യൂറോ നടത്തുന്നില്ലെന്നും പറഞ്ഞു. ഇഷ്ടപ്പെട്ടവർ തമ്മിലുള്ള വിവാഹം തടയാമെന്ന് ആരെങ്കിലും വിചാരിച്ചാൽ അത് നടക്കുന്ന കാര്യവുമല്ലെന്നും പറഞ്ഞു. ധാരാളം വിവാഹം ഈ രീതിയിൽ നടക്കുന്നുണ്ടെന്നും പറഞ്ഞു.
