മൂന്നാറിലെത്തുന്ന സ്ത്രീകളായ സഞ്ചാരികൾക്ക് സുരക്ഷിത താമസസൗകര്യം ഒരുക്കാൻ ഷീ ലോഡ്ജ് വരുന്നു. പള്ളിവാസൽ പഞ്ചായത്തിലാണ് ഷീ ലോഡ്ജ് എന്ന പേരിൽ സ്ത്രീകൾക്ക് താമസ സൗകര്യം ഒരുങ്ങുന്നത്. ഇതിന്റെ നിർമ്മാണ പ്രവർത്തനം പുരോഗമിക്കുകയാണ്. പഞ്ചായത്തിനോട് ചേർന്നുള്ള സ്ഥലത്ത് തനത് ഫണ്ട് ഉപയോഗിച്ചാണ് നിർമ്മാണം നടത്തുന്നത്.
ജില്ലയിലെ ആദ്യ ഷീ ലോഡ്ജ് ആണ് പള്ളിവാസിലിൽ ഉയരുന്നത്. ഒരുകോടി രൂപയാണ് ഇതിന്റെ ചെലവ് പ്രതീക്ഷിക്കുന്നത്. രണ്ടാംമൈൽ വ്യൂ പോയിന്റിന്റെ സൗന്ദര്യം ആസ്വദിക്കത്തക്ക വിധത്തിലാണ് നിർമ്മാണം നടത്തിയിരിക്കുന്നത്. 12 മുറികളും ഭക്ഷണശാലയും കോൺഫറൻസ് ഹാളും ഉൾപ്പെടെ മൂന്ന് നിലകളിലായാണ് ഷീ ലോഡ്ജിന്റെ നിർമ്മാണം പൂർത്തിയാക്കുന്നത്. കെട്ടിടത്തിന്റെ നിർമ്മാണം അവസാനഘട്ടത്തിലേക്ക് അടുക്കുകയാണ്.
ഷീ ലോഡ്ജ് സൗകര്യമൊരുങ്ങുന്നതോടെ മിതമായി നിരക്കിൽ താമസസൗകര്യം ലഭ്യമാക്കി മൂന്നാറിൽ എത്തുന്ന സ്ത്രീകൾക്ക് കൂടുതൽ സുരക്ഷ ഉറപ്പാക്കാൻ ആകുമെന്ന് പഞ്ചായത്ത് പ്രസിഡന്റ് വി.ജി. പ്രതീഷ് കുമാർ പറഞ്ഞു. ടൂറിസം സാധ്യതകൾ മുതലാക്കി വികസനത്തിന്റെ പുതിയ മാതൃകകൾ തീർത്തതാണ് പള്ളിവാസൽ മുന്നോട്ടുപോകുന്നത്.
