ന്യൂഡൽഹി: സ്വർണക്കടത്തിൽ കേരളം ഒന്നാമതെന്ന് കേന്ദ്ര ധനമന്ത്രാലയത്തിന്റെ റിപ്പോർട്ട്. വിമാനത്താവളങ്ങൾ, തുറമുഖങ്ങൾ തുടങ്ങിയവ വഴി നികുതിവെട്ടിച്ചുള്ള സ്വർണക്കടത്തിൽ ഏറ്റവും കൂടുതൽ കേസുകൾ കേരളത്തിലാണ് റിപ്പോർട്ട് ചെയ്തത്. റവന്യൂ ഇന്റലിജൻസിന്റെ റിപ്പോർട്ടുപ്രകാരം നാലുവർഷത്തിനിടെ 3173 കേസാണ് കേരളത്തിൽ റിപ്പോർട്ട് ചെയ്തത്. 2291.51 കിലോഗ്രാം സ്വർണമാണ് കള്ളക്കടത്തുകാരിൽ നിന്നും പിടിച്ചെടുത്തത്.

സ്വർണക്കടത്തിൽ കേരളത്തിനുപിന്നിൽ തമിഴ്‌നാടും (2979 കേസ്) മഹാരാഷ്ട്രയുമാണെന്നും (2528 കേസ്) ധനമന്ത്രാലയം അറിയിച്ചു. തിരുവനന്തപുരം, കൊച്ചി, കോഴിക്കോട് വിമാനത്താവളങ്ങളാണ് ഇതിന്റെ പ്രധാന കേന്ദ്രങ്ങൾ.

കേരളം പണ്ടും സ്വർണക്കടത്തിന്റെ ഇഷ്ടമേഖലകളിലൊന്നാണെന്ന് കസ്റ്റംസ് അധികൃതർ പറയുന്നു.പരിമിതമായ ഉദ്യോഗസ്ഥരാണുള്ളതെങ്കിലും കൃത്യമായ പരിശോധനയിലൂടെയാണ് കള്ളക്കടത്തുകാർ പിടിയിലാകുന്നത്. സ്വർണം കൂടുതലെത്തുന്നത് ഗൾഫ് രാജ്യങ്ങളിൽനിന്നാണെന്നും അധികൃതർ പറയുന്നു.