കോഴിക്കോട്: സ്ഥാനാർത്ഥിയായി പ്രഖ്യാപിക്കുന്നതിനു മുമ്പേ തൃശൂരിൽ ടിഎൻ പ്രതാപന്റെ പേരിൽ ചുവരെഴുത്ത് വന്നത് തെറ്റാണെന്ന് കോൺഗ്രസ് നേതാവ് കെ. മുരളീധരൻ എംപി. പേരും ചിഹ്നവും എഴുതിയത് തെറ്റാണെന്നും 'യുഡിഎഫ് ബുക്ക്ഡ്' എന്നെഴുതുന്നതാണ് ഉചിതമെന്നും മുരളീധരൻ വിശദീകരിച്ചു.

തൃശൂരിൽ പ്രധാനമന്ത്രിയുടെ തുടർ സന്ദർശനത്തിനു പിന്നാലെ മുന്നൂറു സ്ഥലങ്ങളിൽ കോൺഗ്രസിന് വോട്ടഭ്യർഥിച്ച് ചുവരെഴുതാൻ യുഡിഎഫ് പ്രവർത്തകർക്ക് നിർദ്ദേശം നൽകിയിരുന്നു. ഇതേത്തുടർന്ന് വെങ്കിടങ്ങ് സെന്ററിൽ ചെയ്ത ചുവരെഴുത്തിൽ പ്രവർത്തകർ ടി.എൻ. പ്രതാപന്റെ പേരുകൂടി ചേർക്കുകയായിരുന്നു.

പ്രതാപൻ പ്രതാപത്തോടെ തുടരുമെന്നും ചുവരിലെഴുത്തിലുണ്ടായിരുന്നു. സംഭവം വാർത്തയായതിന് പിന്നാലെ പ്രതാപൻ ഇടപെട്ട് പേര് മായ്ച്ചുകളയുകയും ചെയ്തു.