രാജാ രവിവർമ്മ പുരസ്‌കാരം ചിത്രകാരൻ സുരേന്ദ്രൻ നായർക്ക്
തിരുവനന്തപുരം: രാജാ രവിവർമ്മ പുരസ്‌കാരം പ്രഖ്യാപിച്ചു. പ്രശസ്ത ചിത്രകാരൻ സുരേന്ദ്രൻ നായരാണ് പുരസ്‌കാരത്തിന് അർഹനായത്. മൂന്നു ലക്ഷം രൂപയും പ്രശസ്തി പത്രവും ഫലകവും അടങ്ങുന്നതാണ് പുരസ്‌കാരം. ചിത്രകലയുടെ വിവിധ മേഖലകളിൽ നൽകിയ നിസ്തുലമായ സംഭാവനകൾ പരിഗണിച്ചാണ് സുരേന്ദ്രൻ നായരെ പുരസ്‌കാരത്തിന് തിരഞ്ഞെടുത്തത്. 2022 വർഷത്തെ പുരസ്‌കാരമാണ് പ്രഖ്യാപിച്ചത്.
ചിത്രകലാ രംഗത്ത് സമഗ്ര സംഭാവനകൾ നൽകിയ പ്രതിഭകൾക്ക് സാംസ്‌കാരിക വകുപ്പ് നൽകുന്ന പരമോന്നത അംഗീകാരമാണ് രവി വർമ്മ പുരസ്‌ക്കാരം. എഴുത്തുകാരനും ആർട്ട് ക്യുറേറ്ററുമായ സദാനന്ദ മേനോൻ ചെയർമാനും ചിത്രകലാകാരന്മാരായ നീലിമ ഷെയ്ഖ്, ഷിബു നടേശൻ, കെ.എം മധുസൂദനൻ, ലളിത കലാ അക്കാദമി സെക്രട്ടറി എൻ.ബാലമുരളീകൃഷ്ണൻ എന്നിവർ അംഗങ്ങളുമായുള്ള സമിതിയാണ് പുരസ്‌കാരം ജേതാവിനെ തെരഞ്ഞെടുത്തത്.
ദൃശ്യകലയിലെ മികവ്, സ്ഥിരതയാർന്ന സാങ്കേതിക മികവ്, ശ്രദ്ധേയമായ മാനവികത, പ്രതീകാത്മക ഭാഷയുടെ ശക്തമായ പ്രയോഗം എന്നിവ പരിഗണിച്ചാണ് പുരസ്‌കാരമെന്ന് ജൂറി അഭിപ്രായപ്പെട്ടു. പുരസ്‌കാരവിതരണ തീയതി പിന്നീട് പ്രഖ്യാപിക്കും.
