തിരുവനന്തപുരം: കോഴിക്കോട് വിമാനത്താവളം വഴി പോകുന്ന ഹജ്ജ് തീർത്ഥാടകരുടെ യാത്രാക്കൂലി കുറച്ചതായി കേന്ദ്ര ന്യൂനപക്ഷ മന്ത്രാലയം അറിയിച്ചു. 25/01/2024ന് സംസ്ഥാന ഹജ്ജ് തീർത്ഥാടനം വകുപ്പ് മന്ത്രി നൽകിയ കത്തിന് മറുപടിയായി കേന്ദ്ര മന്ത്രി സ്മൃതി ഇറാനി 22/02/2024 ന് അയച്ച മറുപടിയിലാണ് ഇക്കാര്യം അറിയിച്ചിട്ടുള്ളത്. 1,65,000/ ആയിരുന്നു കോഴിക്കോട് എംബാർക്കേഷൻ പോയിന്റിലേക്ക് എയർ ഇന്ത്യ നിശ്ചയിച്ചിരുന്ന നിരക്ക്. ഇതിൽ 42000 രൂപ കുറച്ചു. അപ്പോൾ 1,23,000/ രൂപ ആയിരിക്കും കോഴിക്കോട് നിന്നുള്ള പുതിയ നിരക്ക്.

ഹജ്ജ് സംബന്ധമായ കാര്യങ്ങളിൽ ഇടതടവില്ലാതെയും സമയബന്ധിതവുമായും നടപടി സ്വീകരിച്ചു വരുന്നതായും സംസ്ഥാനം 2023-ൽ ആവശ്യപ്പെട്ടതനുസരിച്ച് എംബാർക്കേഷൻ പോയിന്റുകൾ വർദ്ധിപ്പിച്ച സാഹചര്യം 2024-ലും നിലനിർത്തിയിട്ടുണ്ടെന്നും കേന്ദ്രമന്ത്രി അറിയിച്ചു. യാത്രാക്കൂലി കുറയ്ക്കുന്നത് സംബന്ധിച്ച് സംസ്ഥാനം ആവശ്യപ്പെട്ട കാര്യം അനുഭാവപൂർവ്വം പരിഗണിച്ചു. എംബാർക്കേഷൻ പോയിന്റുകളിൽ വിളിച്ച ടെണ്ടറുകളിൽ ക്വാട്ടുകൾ ലഭിക്കുന്നത് വിവിധ സാങ്കേതിക കാര്യങ്ങൾ മുൻനിർത്തി ആണെന്നും അതാണ് കോഴിക്കോടിന് നിരക്ക് ഉയർന്നത്. സംസ്ഥാനത്തിന്റെ താൽപ്പര്യം മുൻനിർത്തിയും തീർത്ഥാടകരുടെ ക്ഷേമം ലക്ഷ്യമിട്ടുമാണ് യാത്രാക്കൂലിയിൽ കുറവ് വരുത്തിയതെന്നും അറിയിച്ചിട്ടുണ്ട്.