വൈക്കം: ഡിജിറ്റല്‍ അറസ്റ്റിന്റെ പേരില്‍ വെക്കം ടി.വി.പുരം സ്വദേശിയുടെ 31 ലക്ഷം രൂപ തട്ടിയെടുത്തതായി പരാതി. 55കാരനാണ് തട്ടിപ്പിനിരയായത്. ഇദ്ദേഹത്തിന്റെ ബാങ്ക് അക്കൗണ്ട് വഴി അനധികൃത പണമിട് നടത്തിയെന്ന് ആരോപിച്ചായിരുന്നു തട്ടിപ്പ്. നവംബര്‍ 27-നാണ് കേസിനാസ്പദമായ സംഭവം. സംഭവത്തില്‍ പോലീസ് കേസ് രജിസ്റ്റര്‍ചെയ്ത് അന്വേഷണം ആരംഭിച്ചു.

ഉച്ചയ്ക്ക് 1.30-ന് മൂന്ന് നമ്പരുകളില്‍നിന്ന് ഇദ്ദേഹത്തിന്റെ ഫോണിലേക്ക് വിളികള്‍ വന്നതോടെയാണ് തട്ടിപ്പിന്റെ തുടക്കം. സംസ്ഥാനത്തിന് പുറത്ത് അടക്കം യാത്രചെയ്ത് ജോലിചെയ്യുന്നയാളാണ് ഈ 55 വയസ്സുകാരന്‍. ഇദ്ദേഹത്തിന്റെ മുംബൈയിലെ ബാങ്ക് അക്കൗണ്ടുവഴി മൂന്നുകോടി രൂപയുടെ അനധികൃത പണമിടപാട് നടത്തിയെന്നും സുപ്രീംകോടതി കേസെടുത്തെന്നും പറഞ്ഞായിരുന്നു ഫോണ്‍വിളി. ഈ ഇടപാടില്‍ 10 ശതമാനം കമ്മിഷന്‍ കൈപ്പറ്റിയെന്ന് കണ്ടെത്തിയതായും തട്ടിപ്പുകാര്‍ ഇദ്ദേഹത്തെ അറിയിച്ചു.

കേസുമായി ബന്ധപ്പെട്ടുള്ള വ്യാജ സുപ്രീംകോടതി ഉത്തരവും വാട്സാപ്പില്‍ അയച്ചുകൊടുത്തു വിശ്വസിപ്പിച്ച ശേഷമായിരുന്നു തട്ടിപ്പ്. അൗണ്ടിലെ ഇടപാടുകള്‍ വിശദമായി പരിശോധിക്കണമെന്നും അതിനായി അക്കൗണ്ടുവഴി പണം അയക്കണമെന്നും ആവശ്യപ്പെട്ടു. ഇദ്ദേഹം, വൈക്കത്തെ ബാങ്ക് അക്കൗണ്ടുവഴി തട്ടിപ്പുകാര്‍ നല്‍കിയ ജമ്മു കശ്മീരിലെ ബാങ്ക് അക്കൗണ്ടിലേക്ക് 31 ലക്ഷം അയച്ചുകൊടുത്തുവെന്ന് പോലീസ് പറയുന്നു.

കര്‍ണാടക സ്വദേശികളായ മൂന്നുപേരാണ് പ്രതികള്‍. പരാതിയില്‍പറയുന്ന ഫോണ്‍നമ്പരുമായി ബന്ധപ്പെട്ടാണ് അന്വേഷണം. വൈക്കത്ത് നിരവധിപേരാണ് അടുത്തിടെ 'ഡിജിറ്റല്‍ അറസ്റ്റ്' തട്ടിപ്പിന് വിധേയമായത്. ഇത്തരം തട്ടിപ്പുസംഘങ്ങള്‍ക്കെതിരേ ജനങ്ങള്‍ ജാഗ്രതപാലിക്കണമെന്ന് പോലീസ് നിരന്തരം മുന്നറിയിപ്പ് നല്‍കുന്നുണ്ട്.

ഡിജിറ്റല്‍ അറസ്റ്റ്തട്ടിപ്പ്വൈക്കം സ്വദേശി31 ലക്ഷം രൂപdigital arrest

സ്വന്തം ലേഖകൻ