ആശാ വര്‍ക്കര്‍മാര്‍ക്ക് ഭക്ഷണ പൊതിയുമായി രമേശ് ചെന്നിത്തലയുടെ മകന്‍

തിരുവനന്തപുരം: സെക്രട്ടറിയേറ്റിന് മുന്നില്‍ അനിശ്ചിതകാല സമരം നടത്തുന്ന ആശാ വര്‍ക്കര്‍മാര്‍ക്ക് ഭക്ഷണപ്പൊതിയുമായി ശ്രേഷ്ഠ പബ്ലിക്കേഷന്റെ എം.ഡിയും രമേശ് ചെന്നിത്തലയുടെ മകനുമായ ഡോ: രോഹിത് ചെന്നിത്തല. അത്താഴ ഭക്ഷണമാണ് ആശാ വര്‍ക്കര്‍മാര്‍ക്ക് വിതരണം ചെയ്തത്.

'താന്‍ എ.ഡിയായ ശ്രേഷ്ഠ പബ്ലികേഷന്‍ ഓഫീസിന് തൊട്ട് മുന്നിലാണ് കഴിഞ്ഞ ഒരാഴ്ചയായി സമരം നടക്കുന്നത്. ഒരു ഡോക്ടര്‍ എന്ന നിലയ്ക്ക് ആശാവര്‍ക്കര്‍മാര്‍ കേരളത്തിന്റെ ആരോഗ്യരംഗത്ത് നല്‍കുന്ന സംഭാവനകള്‍ സാകൂതം വീക്ഷിക്കുന്ന ഒരാളാണ് ഞാന്‍. വളരെ നിസ്സാര ശമ്പളത്തിന് പണിയെടുക്കുകയും ഉത്തരവാദിത്വങ്ങളെ ഒന്നടങ്കം നിറവേറ്റുകയും അതിനേക്കാളുപരി കോവിഡ് കാലത്ത് കേരളത്തെ കോട്ടകെട്ടി കാക്കുകയും ചെയ്ത ആശാവര്‍ക്കര്‍മാര്‍ എന്നും അത്ഭുതമായിരുന്നു. അവരുടെ നിസ്തുലമായ സംഭാവനകള്‍ എന്നും അത്ഭുതപ്പെടുത്തുകയും അതിശയിപ്പിക്കുകയും ചെയ്തിട്ടുണ്ട്. ന്യായമായ അവകാശങ്ങള്‍ക്ക് വേണ്ടിയുള്ള അവരുടെ സമരത്തെ സമ്പൂര്‍ണ്ണമായി പിന്തുണയ്ക്കുന്നുവെന്നും'' ഡോ: രോഹിത് ചെന്നിത്തല വ്യക്തമാക്കി.

കേരളത്തില്‍ തൊഴിലുറപ്പ് തൊഴിലാളികളേക്കാള്‍ കുറഞ്ഞ ശമ്പളത്തില്‍ ജോലിചെയ്യുന്ന ആശാവര്‍ക്കര്‍മാര്‍ സമൂഹത്തിന് നല്‍കുന്ന സംഭാവനകള്‍ പരിഗണിച്ച് അവരുടെ ആവശ്യങ്ങള്‍ ഉദാരമായി പരിഗണിക്കുകയും അവരുടെ പ്രതിസന്ധികള്‍ക്ക് സര്‍ക്കാര്‍ പരിഹാരം കാണുകയും വേണം എന്ന ഉറച്ച അഭിപ്രായമാണ് തനിക്കുള്ളത് എന്നും അദ്ദേഹം പറഞ്ഞു.