കോളേജ് അധ്യാപികയുടെ ഫോട്ടോ അനുവാദമില്ലാതെ സിനിമയില്‍ ഉപയോഗിച്ചു; 'ഒപ്പം' സിനിമയുടെ നിര്‍മാതാവ് ആന്റണി പെരുമ്പാവൂരിനും സംവിധായകന്‍ പ്രിയദര്‍ശനുമെതിരെ പരാതി നല്‍കി അധ്യാപിക: കോടതി ചിലവടക്കം 2,68,000 രൂപ നഷ്ടപരിഹാരം നല്‍കാന്‍ വിധി
ഫോട്ടോ സിനിമയിൽ; അധ്യാപികയ്ക്ക് നഷ്ടപരിഹാരം നൽകാൻ വിധി
ചാലക്കുടി: കോളേജ് അധ്യാപികയുടെ ഫോട്ടോ അനുവാദമില്ലാതെ സിനിമയില്‍ ഉപയോഗിച്ചെന്ന കേസില്‍ നഷ്ടപരിഹാരം നല്‍കാന്‍ വിധി. അപകീര്‍ത്തി ഉണ്ടാവും വിധം തന്റെ ഫോട്ടോ ഉപയോഗിച്ചെന്ന അധ്യാപികയുടെ പരാതിയിലാണ് കോടതി നഷ്ടപരിഹാരത്തിന് ഉത്തരവിട്ടത്. മോഹന്‍ലാല്‍ നായകനായ 'ഒപ്പം' സിനിമയുടെ നിര്‍മാതാവ് ആന്റണി പെരുമ്പാവൂര്‍, സംവിധായകന്‍ പ്രിയദര്‍ശന്‍ എന്നിവരാണ് എതിര്‍കക്ഷികള്‍. സിനിമയിലെ ഒരു സീനില്‍ അധ്യാപികയുടെ അനുമതിയില്ലാതെ അവരുടെ ഫോട്ടോ ഉപയോഗിക്കുക ആയിരുന്നു.
കാടുകുറ്റി വട്ടോലി സജി ജോസഫിന്റെ ഭാര്യയും കൊടുങ്ങല്ലൂര്‍ അസ്മാബി കോളേജ് അധ്യാപികയുമായ പ്രിന്‍സി ഫ്രാന്‍സിസ് ആണ് പരാതിക്കാരി. അഡ്വ. പി. നാരായണന്‍കുട്ടി മുഖേനയാണ് കോടതിയില്‍ അന്യായം ഫയല്‍ ചെയ്തത്. പരാതിക്കാരിക്ക് ഒരു ലക്ഷം രൂപ നഷ്ടപരിഹാരവും കോടതി ചെലവിലേക്കായി 1,68,000 രൂപയും നല്‍കാനാണ് ചാലക്കുടി മുന്‍സിഫ് എം.എസ്. ഷൈനിയുടെ വിധി. മോഹന്‍ലാല്‍ നായകനടനായി അഭിനയിച്ച ഒപ്പം സിനിമയില്‍ 29-ാം മിനിറ്റില്‍ പോലീസ് ക്രൈം ഫയല്‍ മറിക്കുമ്പോള്‍ ക്രൂരമായി കൊല്ലപ്പെട്ട യുവതിയുടെ ഫോട്ടോ എന്ന നിലയിലാണ് പ്രിന്‍സി ഫ്രാന്‍സിസിന്റെ ചിത്രം നല്‍കിയത്. ഫോട്ടോ അനുവാദമില്ലാതെ തന്റെ ബ്ലോഗില്‍നിന്ന് എടുക്കുകയായിരുന്നെന്ന് പരാതിക്കാരി പറഞ്ഞു. ഇത് മാനസിക വിഷമത്തിന് കാരണമായി. 2017-ല്‍ കോടതിയെ സമീപിച്ചു. എന്നാല്‍ പ്രതികള്‍ പരാതി നിഷേധിച്ചു.
തുടര്‍ന്ന് ആന്റണി പെരുമ്പാവൂര്‍, പ്രിയദര്‍ശന്‍ എന്നിവര്‍ക്ക് പുറമേ അസി.ഡയറക്ടര്‍ മോഹന്‍ദാസ് എന്നിവര്‍ക്കെതിരേ നോട്ടീസ് അയച്ചു. ഈ ഭാഗം ഒഴിവാക്കണമെന്ന് ആവശ്യപ്പെട്ടെങ്കിലും ഇതുവരെയും ഫോട്ടോ ഒഴിവാക്കിയില്ല. സാമൂഹിക പ്രതിബദ്ധതയുടെ ഭാഗമായാണ് കോടതിയെ സമീപിച്ചതെന്നും സാധാരണക്കാരായ സ്ത്രീകള്‍ക്ക് നീതി ലഭിക്കുമെന്ന് ഉറപ്പുണ്ടായിരുന്നെന്നും പ്രിന്‍സി ഫ്രാന്‍സിസ് പറഞ്ഞു.
