പണം അടയ്ക്കാന്‍ സ്വന്തം ക്യൂ ആര്‍ കോഡ് നല്‍കി; ടയര്‍ ഷോപ്പിലെ ജീവനക്കാരി തട്ടിയെടുത്തത് 11.23 ലക്ഷം രൂപ: ഓഡിറ്റിങില്‍ കുടുങ്ങിയതോടെ അറസ്റ്റ് ചെയ്ത് പോലിസ്
പണം അടയ്ക്കാന്‍ സ്വന്തം ക്യുആര്‍ കോഡ്; ജീവനക്കാരി സ്ഥാപനത്തില്‍നിന്ന് തട്ടിയത് 11 ലക്ഷംരൂപ
ഇടുക്കി: ക്യൂ.ആര്‍ കോഡില്‍ തട്ടിപ്പ് നടത്തി നഗരത്തിലെ സ്വകാര്യ ടയര്‍ ഷോപ്പില്‍നിന്ന് 11.23 ലക്ഷം രൂപ തട്ടിയെടുത്ത ജീവനക്കാരി അറസ്റ്റില്‍. അമ്പലക്കവല വെളളൂക്കരവീട്ടില്‍ ശാലിനി (35) ആണ് കട്ടപ്പന പോലീസിന്റെ പിടിയിലായത്. ടയറുകടയില്‍നിന്ന് സാധനം വാങ്ങുന്നവര്‍ക്ക് പണം സ്വന്തം ക്യുആര്‍ കോഡ് നല്‍കി പണം സ്വന്തം അക്കൗണ്ടിലേക്ക് മാറ്റിയാണ് തട്ടിപ്പ് നടത്തിയത്.
നഗരത്തില്‍ പ്രവര്‍ത്തിക്കുന്ന ബാസില്‍ ടയേഴ്‌സ് എന്ന സ്ഥാപനത്തിലെ ബില്ലിങ് ആന്‍ഡ് അക്കൗണ്ടിങ് വിഭാഗത്തിലായിരുന്നു ശാലിനി ജോലിചെയ്തിരുന്നത്. ഇതിനിടെയാണ് സ്വന്തം ക്യുആര്‍ കോഡ് നല്‍കി തട്ടിപ്പ് നടത്തിയതെന്ന് പോലീസ് പറഞ്ഞു.
സാമ്പത്തിക വര്‍ഷാവസാനത്തെ ഓഡിറ്റിങ്ങിലാണ് തട്ടിപ്പുകണ്ടെത്തിയത്. സംഭവത്തില്‍ സ്ഥാപനത്തിലെ ജനറല്‍ മാനേജര്‍ നല്‍കിയ പരാതിയുടെ അടിസ്ഥാനത്തിലാണ് ഇവരെ കട്ടപ്പന പോലീസ് അറസ്റ്റുചെയ്തത്.
