മോഷണത്തിനിടെ കള്ളന്റെ മൊബൈല്‍ ഫോണ്‍ ഭണ്ഡാരത്തില്‍ വീണു; തൂമ്പ ഉപയോഗിച്ച് ഭണ്ഡാരം തകര്‍ക്കാന്‍ ശ്രമം: മോഷ്ടാവിനെ കയ്യോടെ പിടികൂടി നാട്ടുകാര്‍
പള്ളിയുടെ ഭണ്ഡാരം തുറക്കാന്‍ ശ്രമം, കള്ളന്‍ പിടിയില്‍
എറണാകുളം: ആരക്കുഴ സെയ്ന്റ് മേരീസ് മേജര്‍ ആര്‍ക്കി എപ്പിസ്‌കോപ്പല്‍ പള്ളിയിലെ ഭണ്ഡാരത്തില്‍നിന്ന് പണം കവരാനായി എത്തിയ മോഷ്ടാവിനെ നാട്ടുകാര്‍ പിടികൂടി. മോഷണ ശ്രമത്തിനിടെ അബദ്ധത്തില്‍ ആളുടെ മൊബൈല്‍ ഫോണ്‍ ഭണ്ഡാരത്തിലേക്ക് വീണതാണ് കള്ളനെ പിടികൂടാന്‍ സഹായകമായത്. മൂവാറ്റുപുഴ വെള്ളൂര്‍ക്കുന്നം മുടവൂര്‍ വെട്ടിക്കാക്കുടിയില്‍ മുരളി (46) ആണ് പിടിയിലായത്.
ഭണ്ഡാരത്തില്‍ വീണ ഫോണെടുക്കാന്‍ മറ്റുവഴിയില്ലാതായതോടെ തൂമ്പ ഉപയോഗിച്ച് ഭണ്ഡാരം തകര്‍ക്കാന്‍ ശ്രമം തുടങ്ങി. ഈ ശബ്ദം കേട്ട് സമീപവാസികള്‍ ഉണരുകയും മോഷ്ടാവിനെ കൈയോടെ പിടികൂടുകയും ചെയ്തു. ബുധനാഴ്ച പുലര്‍ച്ചെ ഒന്നിനാണ് കാന്തം ഉപയോഗിച്ച് മലേക്കുരിശുപള്ളിയുടെ താഴെയും പള്ളിയുടെ മുന്‍ഭാഗത്തുമുള്ള ഭണ്ഡാരങ്ങളില്‍ നിന്നും പണം കവര്‍ന്നത്. ഇതിനിടെയാണ് ഫോണ്‍ വീണതും പ്രതി പിടിയിലാകുന്നതും.
നാട്ടുകാര്‍ അറിയിച്ചതനുസരിച്ച് സ്ഥലത്തെത്തിയ മൂവാറ്റുപുഴ പോലീസ് ഇന്‍സ്പെക്ടര്‍ ബേസില്‍ തോമസിന്റെ നേതൃത്വത്തില്‍ പ്രതിയെ അറസ്റ്റ് ചെയ്തു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
