അബോധാവസ്ഥയിലായി ഒന്നര വയസുകാരന്‍; കുഞ്ഞുമായി കരഞ്ഞുകൊണ്ട് ബസിലേക്ക് ചാടി കയറി അച്ഛനും അമ്മയും: യാത്രക്കാരുമായി എങ്ങും നിര്‍ത്താതെ ആശുപത്രിയിലേക്ക് കുതിച്ച് സ്വകാര്യ ബസ്

വടകര: അബോധാവസ്ഥയിലായ ഒന്നരവയസ്സുകാരനെ ഉടനടി ആശുപത്രിയിലെത്തിച്ച് സ്വകാര്യ ബസ്. പനിബാധിച്ച് അബോധാവസ്ഥയിലായ കുഞ്ഞുമായി ബസിന് കൈകാണിച്ച മാതാപിതാക്കള്‍ക്കാണ് സ്വകാര്യ ബസ് ജീവനക്കാര്‍ തുണയായത്. കുഞ്ഞിന്റെ അവസ്ഥ കണ്ട ബസ് ജീവനക്കാര്‍ ട്രിപ്പ് മുടക്കി ബസിലുണ്ടായിരുന്ന യാത്രക്കാരുടെ പിന്തുണയോടെയാണ് ബസ് ആശുപത്രിയിലേക്ക് പായിച്ചത്.

കൊയിലാണ്ടി-വടകര റൂട്ടിലോടുന്ന സാരംഗ് ബസ് ജീവനക്കാരാണ് ട്രിപ്പ് പോലും ഉപേക്ഷിച്ച് കുഞ്ഞിനെ വടകര സഹകരണ ആശുപത്രിയില്‍ എത്തിച്ചത്. ഇരിങ്ങത്ത് തയ്യുള്ളപറമ്പില്‍ സുബിന്‍, പയ്യോളി ബീച്ചിലെ വീണ നിവാസില്‍ രൂപേഷ്, ഇരിങ്ങല്‍ പുലിക്കോട് താരമേല്‍ സാരംഗ് എന്നിവരാണ് പുതുപ്പണം ചിക്കിനോത്ത് രഞ്ജിത്തിന്റെ മകനെ തക്കസമയത്ത് ആശുപത്രിയിലെത്തിച്ചത്.

ശനിയാഴ്ച രാവിലെ 11 മണിയോടെയാണ് സംഭവം. കൊയിലാണ്ടിയില്‍നിന്ന് വടകരയിലേക്ക് ട്രിപ്പ് നടത്തുകയായിരുന്നു സാരംഗ് ബസ്. ഇതിനിടെ അരവിന്ദ് കോസ് ബസ്സ്‌റ്റോപ്പില്‍നിന്ന് കുഞ്ഞുമായി അച്ഛനും അമ്മയും കരഞ്ഞുകൊണ്ട് ബസിലേക്ക് കയറുകയായിരുന്നു. കുട്ടിക്ക് ഈ സമയത്ത് ബോധമുണ്ടായിരുന്നില്ലെന്ന് കണ്ടക്ടര്‍ പറഞ്ഞു.

മറ്റു വാഹനങ്ങളന്വേഷിച്ച് പോയാല്‍ ആശുപത്രിയിലെത്തിക്കുന്നത് സമയനഷ്ടവും അപകടവുമുണ്ടാക്കുമെന്ന് തോന്നിയതിനാല്‍ കുട്ടിയെ കയറ്റിയ ഉടന്‍ മറ്റെവിടെയും നിര്‍ത്താതെ ബസ് സഹകരണ ആശുപത്രിയിലേക്ക് പോവുകയായിരുന്നു. കുട്ടിക്ക് ചികിത്സ ഉറപ്പാക്കിയശേഷം ബസ് വടകരയിലേക്കു പോയി.