ദേശഭക്തിഗാനങ്ങളെ വിവാദമാക്കുന്നതിന് പിന്നില്‍ വര്‍ഗീയ അജണ്ട; ആലത്തിയൂര്‍ വിവാദത്തില്‍ പ്രതികരിച്ച് ബി ജെ പി
തിരുവനന്തപുരം: ദേശഭക്തിഗാനങ്ങളെ വിവാദമാക്കുന്നതിന് പിന്നില്‍ ചില സംഘടനകളുടെ വര്‍ഗീയ അജണ്ടയാണെന്ന് ബി ജെ പി. ദേശഭക്തിഗാനത്തിന് ജാതിയോ , മതമോ ,രാഷ്ട്രീയമോ ഇല്ല. ദേശഭക്തി മാത്രമേ ഉള്ളൂ. ആലത്തിയൂര്‍ ഹൈസ്‌ക്കൂളില്‍ ആഗസ്റ്റ് 15 ന് ദേശഭക്തിഗാനം പാടിയതിനെ വിവാദമാക്കുന്നതിനു പിന്നില്‍ വര്‍ഗ്ഗീയ അജണ്ടയും, രാഷ്ട്രീയ അജണ്ടയുമാണുള്ളതെന്ന് ബി ജെ പി സംസ്ഥാന ഉപാധ്യക്ഷന്‍ വി. ഉണ്ണികൃഷ്ണന്‍ മാസ്റ്റര്‍ പ്രസ്താവിച്ചു.
നിഷ്‌ക്കളങ്കരായ കുട്ടികളുടെ മനസ്സിലേക്ക് വിഭാഗീയതയും, വര്‍ഗ്ഗീയതയും കയറ്റി വിടുന്ന രാഷ്ട്രീയം സമൂഹത്തില്‍ ഭിന്നിപ്പുണ്ടാക്കും. മഹാന്‍മാരായ നിരവധി കവികള്‍ സ്വാതന്ത്ര്യ സമര കാലഘട്ടത്തില്‍ ജനങ്ങളില്‍ ദേശഭക്തി പ്രചോദിപ്പിക്കുന്നതിനായി നിരവധി ദേശഭക്തിഗാനങ്ങള്‍ എഴുതിയിട്ടുണ്ട്. അല്ലാമ ഇക്ബാല്‍ എഴുതി പാടിയ 'സാരെ ജഹാം സെ അച്ഛാ' എന്നു തുടങ്ങുന്ന ഗാനം ഏതെങ്കിലും സംഘടനകള്‍ അവരുടെ പരിപാടികളില്‍ പാടിയാല്‍ അതിനെ എതിര്‍ക്കാന്‍ കഴിയുമോ? കേരളത്തിലെ തന്നെ നിരവധി കവികള്‍ എഴുതിയ കവിതകള്‍ ദേശീയപ്രസ്ഥാനങ്ങള്‍ അവരുടെ പരിപാടികളില്‍ ചൊല്ലാറുണ്ട്.
ആലത്തിയൂര്‍ സ്‌ക്കൂളിലെ വിവാദങ്ങള്‍ക്കു പിന്നിലുള്ള രാഷ്ട്രീയ അജണ്ടയും വര്‍ഗ്ഗീയ അജണ്ടയും ജനങ്ങള്‍ തിരിച്ചറിയും. കേരളത്തിലെ നീറുന്ന ജനകീയ പ്രശ്‌നങ്ങളില്‍ നിന്നും ജനശ്രദ്ധ വഴിതിരിച്ചുവിടാനും, കേരളത്തില്‍ ദേശീയതാ ബോധം വളരുന്നത് തടയാനും ചില മാധ്യമങ്ങളെ കൂട്ടുപിടിച്ച് ശ്രമം നടക്കുന്നു. വിവാദങ്ങള്‍ ചര്‍ച്ച ചെയ്യപ്പെടാന്‍ ആഗ്രഹിക്കുന്ന മാധ്യമങ്ങള്‍ ഇക്കൂട്ടരുടെ ഹിഡ്ഡന്‍ അജണ്ട നടപ്പാക്കുകയാണ്. ആര്‍ക്കു വേണ്ടിയാണ് നിങ്ങള്‍ കുഴലൂതുന്നത്. ആഗസ്റ്റ് 15 ന് നടന്ന സ്വാതന്ത്ര്യ ദിന പരിപാടിയില്‍ ദേശഭക്തിഗാനം പാടിയപ്പോള്‍ ആര്‍ക്കും പരിഭവവും പരാതിയുമില്ല. എല്ലാ മത വിഭാഗത്തില്‍ പെട്ട കുട്ടികളും അദ്ധ്യാപകരും ആ വിദ്യാലയത്തിലുണ്ട്. ഗാനം പാടിയ കൂട്ടത്തിലും എല്ലാ വിഭാഗവുമുണ്ട്.
കേരളത്തില്‍ വിവാദ വിഷയങ്ങളുണ്ടാക്കാന്‍ ഗവേഷണം നടത്തുന്ന രാഷ്ട്രീയക്കാരും മാധ്യമങ്ങളും ചേര്‍ന്ന് ഒരു സ്‌കൂളിനെ വിവാദത്തിലേക്ക് കൊണ്ടുപോകരുത്. ഓണാഘോഷ പരിപാടിയില്‍ മുസ്ലിം വിദ്യാര്‍ത്ഥികള്‍ പങ്കെടുക്കരുതെന്ന് ഒരു സ്‌ക്കൂളിലെ അദ്ധ്യാപിക നിര്‍ദേശം നല്‍കിയത് ഇതുമായി ചേര്‍ത്തു വെക്കേണ്ടതാണ്. ദേശഭക്തിഗാനത്തിനും, ആഘോഷങ്ങള്‍ക്കും, രാഷ്ട്രീയ നിറവും, വര്‍ഗ്ഗീയ നിറവും നല്‍കരുത്. സ്‌കൂളില്‍ പാടിയ ദേശഭക്തി ഗാനത്തില്‍ എവിടെയാണ് വര്‍ഗ്ഗീയതയുള്ളതെന്ന് എതിര്‍ക്കുന്നവര്‍ വ്യക്തമാക്കണം. ഇതിനെതിരെ അദ്ധ്യാപകര്‍ക്കെതിരെ നടപടി എടുക്കാനുള്ള ശ്രമം പ്രതിഷേധാര്‍ഹമാണെന്നും വി.ഉണ്ണികൃഷ്ണന്‍ മാസ്റ്റര്‍ പ്രസ്താവിച്ചു.
