ആദ്യ ഭര്‍ത്താവ് മരിച്ചപ്പോള്‍ വീണ്ടും വിവാഹം; രണ്ടാം ഭര്‍ത്താവും മരിച്ചപ്പോള്‍ കൂടെ കൂടിയത് വാഗമണ്ണിലെ ഹോട്ടല്‍ ജീവനക്കാരന്‍; ഒമ്പതാം ക്ലാസുകാരിയുടെ പ്രസവത്തിന് പിന്നില്‍ അമ്മയുടെ സുഹൃത്ത്
കൊല്ലം: ഒമ്പതാം ക്ലാസുകാരി പ്രസവിച്ചതിന് പിന്നിലെ പ്രതിയെ കണ്ടെത്തി പോലീസ്. അമ്മയുടെ കൂടെ താമസിക്കുന്നയാളാണ് കുട്ടിയെ പീഡിപ്പിച്ച് ഗര്‍ഭിണിയാക്കിയത്. ഇയാളെ പൊലീസ് പിടികൂടി. കുട്ടിയെ ബന്ധുക്കള്‍ തിരുവനന്തപുരത്തെ സ്വകാര്യ മെഡിക്കല്‍ കോളേജ് ആശുപത്രിയിലാണ് പ്രവേശിപ്പിച്ചിരുന്നത്. ആശുപത്രിയില്‍ നിന്ന് ലഭിച്ച വിവരത്തിന്റെ അടിസ്ഥാനത്തില്‍ പൊലീസ് കേസെടുത്തു.
കണ്ണൂര്‍ സ്വദേശിയായ പ്രതി വാഗമണ്ണിലെ ഒരു ഹോട്ടലിലെ ജീവനക്കാരനാണ്. കുട്ടിയുടെ അമ്മയുടെ ആദ്യ ഭര്‍ത്താവ് മരിച്ച ശേഷം, രണ്ടാമത് വിവാഹം കഴിച്ച ബന്ധത്തിലാണ് ഈ പെണ്‍കുട്ടി ജനിച്ചത്. തുടര്‍ന്ന് രണ്ടാം ഭര്‍ത്താവും മരിച്ചതോടെ, കഴിഞ്ഞ രണ്ട് വര്‍ഷമായി പ്രതി പെണ്‍കുട്ടിയുടെ അമ്മയ്ക്കൊപ്പമാണ് താമസം.
കുട്ടിയുടെ അമ്മ ഒരു ഹോം നഴ്സായി ജോലി ചെയ്യുന്നതിനാല്‍ മിക്ക ദിവസങ്ങളിലും വീട്ടിലുണ്ടാകാറില്ല. ഈ അവസരം മുതലെടുത്താണ് പ്രതി പെണ്‍കുട്ടിയെ നിരന്തരം പീഡിപ്പിച്ചത്. വാഗമണ്ണില്‍ നിന്ന് പിടിയിലായ പ്രതിയെ കടയ്ക്കല്‍ പോലീസിന് കൈമാറും.
