ഗൂഗിള്‍ മാപ്പ് നോക്കി ആശുപത്രിയിലേക്കുപോയവര്‍ എത്തിയത് കാട്ടില്‍; ജീപ്പ് താഴ്ചയിലേക്ക് ചരിഞ്ഞ് കുടുങ്ങിയ സംഘത്തിന് രക്ഷകരായത് അഗ്നിരക്ഷാ സേന
ഗൂഗിള്‍ മാപ്പ് നോക്കി ആശുപത്രിയിലേക്കുപോയവര്‍ എത്തിയത് കാട്ടില്‍
കണ്ണൂര്‍: ഗൂഗിള്‍ മാപ്പ് നോക്കി ആശുപത്രിയിലേക്കുപോയ സംഘം കാട്ടില്‍ കുടുങ്ങി. ഇവര്‍ സഞ്ചരിച്ച ജീപ്പ് താഴ്ചയിലേക്ക് ചരിഞ്ഞ് കുടുങ്ങിയതോടെ അഗ്‌നിരക്ഷാസേനയെത്തി രക്ഷിച്ചു. തൃശൂര്‍ സ്വദേശിയായ അലന്‍ വര്‍ഗീസിന്റെ വാഹനമാണ് കാട്ടില്‍ കുടുങ്ങിയത്. ജോലി സംബന്ധമായ ആവശ്യത്തിന് കണ്ണൂരിലെത്തിയ സംഘത്തിലെ ഒരാള്‍ക്ക് സുഖമില്ലാതാകുകയായിരുന്നു.
ഇദ്ദേഹത്തെ ആശുപത്രിയിലെത്തിക്കാനാണ് ഇവര്‍ ഗൂഗിള്‍ മാപ്പിന്റെ സഹായം തേടിയത്. കണ്ണപുരം ഭാഗത്തുനിന്ന് പരിയാരം ഗവ മെഡിക്കല്‍ കോളജ് ആശുപത്രിയിലേക്ക് പോകാനാണ് ഗൂഗിള്‍ മാപ്പിന്റെ സഹായം തേടിയത്. എന്നാല്‍ കാടുനിറഞ്ഞ് ഇടുങ്ങിയ, വാഹനങ്ങള്‍ കടന്നുപോകാത്ത കുഞ്ഞന്‍ചാല്‍ ഭാഗത്തു കൂടിയുള്ള വഴിയാണ് ഗൂഗിള്‍ മാപ്പ് കാണിച്ചത്. ഇതുവഴി പോയ ജീപ്പ് ചെറിയ താഴ്ചയിലേക്ക് ചെരിഞ്ഞ് കുടുങ്ങി. നാട്ടുകാര്‍ അറിയിച്ചതിനെത്തുടര്‍ന്ന് തളിപ്പറമ്പില്‍നിന്ന് അഗ്നിരക്ഷാ സേനയെത്തി നാട്ടുകാരുടെയും സഹായത്തോടെ വാഹനം വലിച്ചുകയറ്റി.
