വീട്ടുമുറ്റത്തിരുന്ന എസി പട്ടാപ്പകല്‍ നാടോടി സ്ത്രീകള്‍ കടത്തിക്കൊണ്ടു പോയി; ദുബായിലിരുന്ന് സിസിടിവിയിലൂടെ രംഗം കണ്ട് പ്രവാസി
വീട്ടുമുറ്റത്തിരുന്ന എസി നാടോടി സ്ത്രീകള്‍ കടത്തിക്കൊണ്ടു പോയി
പൊയിനാച്ചി: പ്രവാസിയുടെ വീട്ടുമുറ്റത്ത് അഴിച്ചുവെച്ചിരുന്ന എസി നാടോടിസ്ത്രീകള്‍ പട്ടാപ്പകല്‍ കടത്തിക്കൊണ്ടുപോയി ആക്രിക്കടയില്‍ വിറ്റു. ദുബായിയിലിരുന്ന് സംഭവം സിസിടിവിയില്‍ കണ്ട പ്രവാസി വിവരമറിയിച്ചതിനെ തുടര്‍ന്ന് നടത്തിയ അന്വേഷണത്തില്‍ എസി കണ്ടെത്തി പോലിസ്. നാടോടിസ്ത്രീകളെ പിടികൂടിയെങ്കിലും പരാതി ഇല്ലാത്തതിനാല്‍ പോലീസ് താക്കീത് നല്‍കി വിട്ടയച്ചു. വ്യാഴാഴ്ച ഉച്ചയ്ക്കുശേഷം മാങ്ങാട് കൂളിക്കുന്നിലെ പ്രവാസിയുടെ വീട്ടിലാണ് സംഭവം.
കുടുംബസമേതം ദുബായിയിലാണ് പ്രവാസി. വീട്ടിലെ ജോലിക്കാരന്‍ പുറത്തുപോയ സമയത്താണ് മൂന്ന് നാടോടിസ്ത്രീകള്‍ ഇവരുടെ വീട്ടിലെത്തിയത്. ആളുകള്‍ ആരുമില്ലെന്ന് മനസ്സിലാക്കിയ ഇവര്‍ വീട്ടുപരിസരം അരിച്ചുപെറുക്കി. ഇതിനിടെ നിലത്തുകണ്ട എസിയുമായി കടന്നുകളയുകയായിരുന്നു. വീട്ടില്‍ പുതിയ സ്പിളിറ്റ് എസി അടുത്തിടെ വാങ്ങിയപ്പോള്‍ പഴയത് ഊരിവെച്ചതായിരുന്നു. രണ്ട് സ്ത്രീകള്‍ എസി താങ്ങിപ്പിടിച്ച് പുറത്തുപോകുന്നത് സിസിടിവിയില്‍ കണ്ട പ്രവാസി വിവരം ഉടന്‍ ജോലിക്കാരനെ അറിയിച്ചു.
ചട്ടഞ്ചാലില്‍ പോയിരുന്ന അയാള്‍ തിരിച്ചെത്തുമ്പോഴേക്കും നാടോടികള്‍ എസിയുമായി സ്ഥലംവിട്ടിരുന്നു. പിന്നീട് നടത്തിയ അന്വേഷണത്തില്‍ എസി കളനാട്ട് പാഴ്വസ്തുക്കള്‍ വാങ്ങുന്ന കടയില്‍ 5200 രൂപക്ക് വിറ്റതായി വ്യക്തമായി. കടക്കാരന് നാടോടികളെ പരിചയമുള്ളതിനാല്‍ പൂച്ചക്കാട്ടെ ക്വാര്‍ട്ടേഴ്‌സിലാണ് ഇവര്‍ താമസിക്കുന്നതെന്ന് സൂചന ലഭിച്ചു. ശനിയാഴ്ച മേല്‍പ്പറമ്പ് പോലീസ് സംഘത്തെ കൈയോടെ പൊക്കി. കളനാട്ടെ കടയില്‍ വിറ്റ എസിയും കിട്ടി. വീട്ടുകാര്‍ വിറ്റതാണ് എസിയെന്നാണ് നാടോടികള്‍ കടക്കാരനോട് പറഞ്ഞിരുന്നതുന്നത്. പരാതിയുമായി വീട്ടുകാര്‍ മുന്നോട്ട് പോകാത്ത സാഹചര്യത്തില്‍ എസി തിരിച്ചുകൊടുത്ത് നാടോടികളെ താക്കീത് നല്‍കി വിട്ടയച്ചതായി മേല്‍പ്പറമ്പ് പോലീസ് പറഞ്ഞു.
