ഹോട്ടല്‍ കെട്ടിടനിര്‍മ്മാണ ലൈസന്‍സിന് കൈക്കൂലി; നഗരസഭാ എന്‍ജിനീയര്‍ക്ക് ഏഴുവര്‍ഷം കഠിനതടവും ഒന്നരലക്ഷം രൂപ പിഴയും
നഗരസഭാ എന്‍ജിനീയര്‍ക്ക് ഏഴുവര്‍ഷം കഠിനതടവും ഒന്നരലക്ഷം രൂപ പിഴയും
കോട്ടയം: ഹോട്ടല്‍ കെട്ടിടനിര്‍മ്മാണ ലൈസന്‍സിന് കൈക്കൂലി വാങ്ങിയ നഗരസഭാ എന്‍ജിനീയര്‍ക്ക് ഏഴുവര്‍ഷം കഠിനതടവും ഒന്നരലക്ഷം രൂപ പിഴയും വിധിച്ചു. കോട്ടയം വിജിലന്‍സ് കോടതിയുടേതാണ് ഉത്തരവ്. കോട്ടയം നഗരസഭാ സോണല്‍ ഓഫീസില്‍ അസിസ്റ്റന്റ് എന്‍ജിനീയറായിരുന്ന തിരുവല്ല കിഴക്കന്‍മുത്തൂര്‍ കുടമാളൂര്‍ കോട്ടേജില്‍ മാര്‍ട്ടിന്‍ ആന്റണിയെ ആണ് കോട്ടയം വിജിലന്‍സ് കോടതി ജഡ്ജി കെ.വി. രജനീഷ് ഏഴു വര്‍ഷത്തെ തടവിന് ശിക്ഷിച്ചത്.
2014-ലായിരുന്നു കേസിനാസ്പദമായ സംഭവം. പരാതിക്കാരന്റെ കോട്ടയം നീലിമംഗലത്തുള്ള വസ്തുവില്‍ ഹോട്ടല്‍ നിര്‍മിക്കാനുള്ള കെട്ടിടത്തിന് അനുമതി തേടി. എന്നാല്‍ ഇത് നല്‍കുന്നതിനായി പ്രതി പലതവണ കൈക്കൂലി ആവശ്യപ്പെട്ടു. കുമാരനല്ലൂര്‍ മുനിസിപ്പല്‍ സോണല്‍ ഓഫീസില്‍ കൈക്കൂലിയായി 15,000 രൂപ വാങ്ങി. ഇതോടെ പരാതിക്കാരന്‍ വിജിലന്‍സിനെ സമീപിച്ചു. മാര്‍ട്ടിനെ വിജിലന്‍സ് അറസ്റ്റ് ചെയ്തു.
വിചാരണ തുടങ്ങുംമുമ്പേ പരാതിക്കാരന്‍ മരിച്ചുപോയതിനാല്‍ അദ്ദേഹത്തെ കോടതിക്ക് വിസ്തരിക്കാന്‍ കഴിഞ്ഞില്ല. കേസില്‍ പ്രോസിക്യൂഷന് സാക്ഷിയായിരുന്ന ഗസറ്റഡ് ഓഫീസര്‍ വിചാരണവേളയില്‍ കൂറുമാറിയിരുന്നു. പരാതിക്കാരനില്‍നിന്ന് കൈക്കൂലി വാങ്ങിയതിന്റെ സാഹചര്യത്തെളിവുകളും പ്രതി നടത്തിയ ഫോണ്‍ സംഭാഷണവും പ്രോസിക്യൂഷന് കോടതിയില്‍ തെളിയിക്കാന്‍ കഴിഞ്ഞു. പണം വാങ്ങുമ്പോള്‍ ക്യാബിനിലെത്തിയ മറ്റൊരാള്‍ സാക്ഷിമൊഴിയില്‍ ഉറച്ചുനിന്നതും പ്രോസിക്യൂഷന് സഹായമായി. പ്രോസിക്യൂഷനുവേണ്ടി വിജിലന്‍സ് പ്രോസിക്യൂട്ടര്‍ കെ.കെ. ശ്രീകാന്ത് കോടതിയില്‍ ഹാജരായി.
