ന്യൂനപക്ഷ സംരക്ഷണം ഇടതുപക്ഷത്തിന്റെ എക്കാലത്തെയും നയം; അത് തിരഞ്ഞെടുപ്പ് ലാഭത്തിനുള്ളതല്ല; ഭൂരിപക്ഷ വര്ഗീയതയെ എതിര്ക്കാന് ന്യൂനപക്ഷ വര്ഗീയത ആയുധമാക്കരുത്; രണ്ടും പരസ്പര പൂരകങ്ങള്: സമസ്ത വേദിയില് പിണറായി വിജയന്
സമസ്ത വേദിയില് പിണറായി വിജയന്
തിരുവനന്തപുരം: ന്യൂനപക്ഷങ്ങളെ ചേര്ത്തുപിടിക്കുന്ന നിലപാട് ഇടതുപക്ഷത്തിന്റെ എക്കാലത്തെയും നയമാണെന്നും അത് തിരഞ്ഞെടുപ്പ് ഫലം കൊണ്ട് അളക്കാനാകില്ലെന്നും മുഖ്യമന്ത്രി പിണറായി വിജയന്. തിരുവനന്തപുരം പുത്തരിക്കണ്ടം മൈതാനത്ത് സമസ്ത ശതാബ്ദി സന്ദേശയാത്രയുടെ സ്വീകരണ സമ്മേളനത്തില് സംസാരിക്കുകയായിരുന്നു അദ്ദേഹം. ന്യൂനപക്ഷ സംരക്ഷണം തിരഞ്ഞെടുപ്പ് ലക്ഷ്യമിട്ടുള്ളതല്ലെന്നും സര്ക്കാരിന്റെ മുന്കാല പ്രവര്ത്തനങ്ങള് പരിശോധിച്ചാല് അത് വ്യക്തമാകുമെന്നും അദ്ദേഹം കൂട്ടിച്ചേര്ത്തു.
നാടിന്റെ പുരോഗതിക്കും സമാധാനത്തിനും അനുകൂലമായി ചിന്തിക്കുന്നവര് മതനിരപേക്ഷതയുടെ പക്ഷത്ത് ഉറച്ചുനില്ക്കണം. ന്യൂനപക്ഷങ്ങളെ വര്ഗീയവത്കരിക്കാന് ശ്രമിക്കുന്ന ശക്തികള് നാട്ടിലുണ്ട്. അത് തിരിച്ചറിയാന് ആകണം.
നാടിന്റെ ഐക്യവും സമാധാനവും തകര്ക്കാന് ആരെയും അനുവദിക്കില്ലെന്ന ഉറച്ച സന്ദേശം ഈ യാത്രയില് പ്രചരിപ്പിക്കാനാകണമെന്നും മുഖ്യമന്ത്രി പറഞ്ഞു. മതനിരപേക്ഷതയുടെ മുഖംമൂടി അണിയുന്നവരെ തിരിച്ചറിയാനാകണം. ഭൂരിപക്ഷ വര്ഗീയതയെ എതിര്ക്കാന് ന്യൂനപക്ഷ വര്ഗീയത ആയുധമാക്കുന്നത് തിരിച്ചറിയണം. ഈ രണ്ട് വര്ഗീയതയും പരസ്പര പൂരകമാണ്. അതിനെ തിരിച്ചറിയാന് കഴിയേണ്ടതുണ്ട്. എല്ലാ വര്ഗീയ വാദികള്ക്കും ഒരു പ്രത്യേകതയുണ്ട്. നുണ നല്ലരീതിയില് പ്രചരിപ്പിക്കുകയെന്നതാണ് അതെന്നും മുഖ്യമന്ത്രി പറഞ്ഞു.
വര്ഗീയ ശക്തികള്ക്കെതിരെ നെഞ്ച് വിരിച്ച നിന്ന ചരിത്രമാണ് ഇടതുപക്ഷത്തിന്റേതെന്ന് മുഖ്യമന്ത്രി പിണറായി വിജയന്. ന്യൂനപക്ഷങ്ങള്ക്ക് തല ഉയര്ത്തി ജീവിക്കാനുള്ള സാഹചര്യം ഒരുക്കാന് ഇടതുപക്ഷം പ്രതിജ്ഞാബദ്ധമാണെന്ന് പിണറായി പറഞ്ഞു. ഇടത് സര്ക്കാരാണ് മലപ്പുറം ജില്ലയ്ക്ക് രൂപം നല്കിയത്. മലപ്പുറം രൂപീകരിക്കുമ്പോള് ഇടത് സര്ക്കാര് നേരിട്ട വിമര്ശനങ്ങള് അറിയാമല്ലോ.
ന്യൂനപക്ഷങ്ങളുടെ ആശങ്കകള് പരിഹരിക്കുന്നതിനും അവരെ ചേര്ത്തുപിടിച്ച് മുന്നോട്ട് പോകുന്നതിനും സംസ്ഥാന സര്ക്കാര് എല്ലാ ഘട്ടത്തിലും തയ്യാറായിട്ടുണ്ട്. ഇനിയും തയ്യാറാകും എന്ന ഉറപ്പാണ് നല്കുന്നത്. നമ്മുടെ നാടിന്റെ മതനിരപേക്ഷത സൂക്ഷിക്കാന് ഇടതുപക്ഷം വിട്ടുവീഴ്ചയില്ലാത്ത നിലപാട് സ്വീകരിച്ചിട്ടുണ്ട്. വര്ഗീയത തലയുയര്ത്തുമ്പോഴെല്ലാം ഇടതുപക്ഷം ശക്തമായി നിലകൊണ്ടു. മലബാര് കലാപത്തിന് ശേഷം മുസ്ലിം പള്ളി നിര്മ്മാണത്തിന് ഉണ്ടായിരുന്ന വിലക്ക് നീക്കിയത് ഇഎംഎസ് സര്ക്കാരാണ്. മലബാര് മേഖലയില് കൂടുതല് സ്കൂളുകള് നിര്മ്മിച്ചത് 1957 ലെ സര്ക്കാരാണ്. മലപ്പുറം ജില്ല രൂപീകരിച്ചതും ആ സര്ക്കാരാണ്. ഇതെല്ലാം ന്യൂനപക്ഷങ്ങളെ എല്ലാകാലത്തും ചേര്ത്തു പിടിച്ചിട്ടുണ്ടെന്നതിന് തെളിവാണ്. ന്യൂനപക്ഷ സംരക്ഷണം തെരഞ്ഞെടുപ്പ് മുന്നില് കണ്ടല്ല. എല്ഡിഎഫ് സര്ക്കാരിന്റെ പ്രവര്ത്തനം നോക്കിയാല് വ്യക്തമാകും. നാടിന്റെ പുരോഗതിക്കും സമാധാനത്തിനും അനുകൂലമായി ചിന്തിക്കുന്നവര് മതനിരപേക്ഷതയുടെ പക്ഷത്ത് ഉറച്ചുനില്ക്കണം. ന്യൂനപക്ഷങ്ങളെ വര്ഗീയവല്ക്കരിക്കാന് ശ്രമിക്കുന്ന ശക്തികള് നാട്ടിലുണ്ട്. അത് തിരിച്ചറിയാന് ആകണം. നാടിന്റെ ഐക്യവും സമാധാനവും തകര്ക്കാന് ആരെയും അനുവദിക്കില്ലെന്ന ഉറച്ച സന്ദേശം ഈ യാത്രയില് പ്രചരിപ്പിക്കാനാവണമെന്നും മുഖ്യമന്ത്രി പറഞ്ഞു.
കേരളത്തില് മതനിരപേക്ഷ സമൂഹത്തെ വളര്ത്തിയെടുക്കുന്നതില് സമസ്തയ്ക്കും വലിയ പങ്കുണ്ട്. സമൂഹത്തില് സമാധാനവും സഹവര്ത്തിത്വം നിലനിര്ത്തുന്നതിലും സമസ്ത ശ്രദ്ധ നല്കി. സമൂഹത്തിന്റെ മതനിരപേക്ഷത പാലിക്കുന്ന അഭിപ്രായപ്രകടനങ്ങളാണ് ജിഫ്രി മുത്തുക്കോയ തങ്ങളുടേത്. വര്ഗീയത ഫണം വിടര്ത്തിയാടുന്ന സമയത്തൊക്കെ മനുഷ്യപക്ഷത്തു നില്ക്കാന് സംഘടനയ്ക്ക് കഴിഞ്ഞിട്ടുണ്ട്. കൂടുതല് ജാഗ്രതയോടെ പ്രവര്ത്തിക്കേണ്ട കാലഘട്ടമാണിത്. നാനാത്വത്തില് ഏകത്വം ഓരോ നിമിഷവും തച്ചുതകര്ക്കപ്പെടുന്നു. മുസ്ലീം സമുദായത്തിന്റെ ന്യായമായ അവകാശങ്ങള്ക്ക് വേണ്ടി പോരാടാന് സമസ്തക്ക് സാധിച്ചു.
