സ്വന്തം ബ്രാന്റില് കുടിവെള്ളം പുറത്തിറക്കാന് കെഎസ്ആര്ടിസി; വില കുറയുമെന്ന് മന്ത്രി കെബി ഗണേഷ് കുമാര്
തിരുവനന്തപുരം: സ്വന്തമായി ബ്രാന്റിംഗ് ചെയ്ത കുടിവെള്ളം പുറത്തിറക്കാന് ഒരുങ്ങി കെ എസ് ആര് ടി സി. കുപ്പിവെള്ളത്തിന് പുറത്ത് കെ എസ് ആര് ടി സി ലേബല് അടക്കം ഉണ്ടാകും. വെളിയില് കിട്ടുന്നതിനേക്കാള് ഒരു രൂപ കുറച്ചാണ് കുപ്പി വെള്ളം വില്ക്കുക. യാത്രക്കിടക്കും യാത്രക്കാര്ക്ക് ഈ വെള്ളം വാങ്ങാവുന്നതാണ്. വെള്ളം വില്ക്കുന്ന കണ്ടക്ടര്മാര്ക്കും ഡ്രൈവര്മാര്ക്കും വിറ്റ് ലഭിക്കുന്ന പണത്തില് നിന്ന് പാരിതോഷികവും പ്രഖ്യാപിച്ചിട്ടുണ്ട്. ഒരു കുപ്പി വെള്ളം വില്ക്കുമ്പോള് കണ്ടക്ടര്ക്ക് 2 രൂപയും, ഡ്രൈവര്ക്ക് 1 രൂപയും പാരിതോഷികമായി ലഭിക്കുമെന്ന് മന്ത്രി കെ ബി ഗണേഷ് കുമാര്. പേപ്പര് വര്ക്കുകളും മറ്റും പൂര്ത്തിയാകുന്നതോടെ പൊതുജനത്തിന് കുടിവെള്ളം കയ്യില് കിട്ടിത്തുടങ്ങുമെന്നാണ് പ്രതീക്ഷിക്കുന്നത്.
മകര വിളക്കിനോടനുബന്ധിച്ച് പമ്പയിലേക്ക് സര്വീസ് നടത്തുന്നതിന് 900 ബസ്സുകള് സജ്ജമാക്കിയിട്ടുണ്ടെന്ന് ഗതാഗത വകുപ്പ് മന്ത്രി കെ.ബി ഗണേഷ് കുമാര് പറഞ്ഞു. ആവശ്യമെങ്കില് നൂറു ബസ്സുകള് കൂടി അനുവദിക്കുമെന്നും മന്ത്രി അറിയിച്ചു. പമ്പയില് നടത്തിയ അവലോകനയോഗത്തില് സംസാരിക്കുകയായിരുന്നു മന്ത്രി. കൂടുതല് ബസ്സുകള് സര്വീസ് നടത്തുന്നതിനനുസരിച്ച് പമ്പ ഹില്ടോപ്പില് പാര്ക്കിങ്ങിന് കൂടുതല് സൗകര്യം ഏര്പ്പെടുത്തും. പരാതികള് കുറഞ്ഞ ഒരു സീസണായിരുന്നു ഇത്തവണത്തേതെന്നും മന്ത്രി പറഞ്ഞു.
