രണ്ട് കൊലക്കേസുകളില് പ്രതി; ജാമ്യത്തിലിറങ്ങി കുവൈറ്റിലേക്ക് മുങ്ങിയ കുപ്രസിദ്ധ ഗുണ്ട വിമാനത്താവളത്തില് പിടിയില്
തിരുവനന്തപുരം: വര്ഷങ്ങള്ക്ക് മുന്പ് നടന്ന രണ്ട് കൊലപാതക കേസുകളില് ജാമ്യത്തിലിറങ്ങി വിദേശത്തേക്ക് കടന്ന പ്രതിയെ പോലീസ് പിടികൂടി. മുറിഞ്ഞപാലം സ്വദേശിയും മെഡിക്കല് കോളേജ് സ്റ്റേഷനിലെ റൗഡി ലിസ്റ്റില്പ്പെട്ടയാളുമായ ഷിജു ആണ് തിരുവനന്തപുരം വിമാനത്താവളത്തില് വെച്ച് പോലീസ് പിടിയിലായത്.
2006-ല് മെഡിക്കല് കോളേജ് പരിധിയില് നടന്ന അനീഷ് വധക്കേസിലും, 2009-ല് കഴക്കൂട്ടം പോലീസ് സ്റ്റേഷന് പരിധിയില് നടന്ന സുള്ഫിക്കര് വധക്കേസിലും ഷിജു പ്രതിയാണ്. ഈ കേസുകളില് ജാമ്യം ലഭിച്ചതിന് പിന്നാലെ ഇയാള് നിയമനടപടികളില് നിന്ന് രക്ഷപ്പെടാന് കുവൈറ്റിലേക്ക് മുങ്ങുകയായിരുന്നു. ഇയാളെ കണ്ടെത്താന് സ്റ്റേറ്റ് സ്പെഷ്യല് ബ്രാഞ്ച് ലുക്കൗട്ട് നോട്ടീസ് പുറപ്പെടുവിച്ചിരുന്നു. അറസ്റ്റ്: ഇന്ന് രാവിലെ തിരുവനന്തപുരം വിമാനത്താവളത്തില് വന്നിറങ്ങിയ ഷിജുവിനെ എമിഗ്രേഷന് വിഭാഗം തിരിച്ചറിയുകയും തുടര്ന്ന് പോലീസ് സംഘം കസ്റ്റഡിയിലെടുക്കുകയുമായിരുന്നു.
പിടികൂടിയ പ്രതിയെ കൂടുതല് നടപടികള്ക്കായി കഴക്കൂട്ടം പോലീസിന് കൈമാറി. ഇയാള് ഇത്രയും കാലം വിദേശത്ത് എങ്ങനെ കഴിഞ്ഞു എന്നതിനെക്കുറിച്ചും ആരുടെയെങ്കിലും സഹായം ലഭിച്ചിട്ടുണ്ടോ എന്നതിനെക്കുറിച്ചും പോലീസ് അന്വേഷണം ആരംഭിച്ചു.
