ഹരിതകര്മ സേനാംഗങ്ങള്ക്കെതിരെ യുട്യൂബിലൂടെ അശ്ലീല പരാമര്ശം; കോടതി ജീവനക്കാരന് പിടിയില്
കൊല്ലം : ഹരിതകര്മ സേനാംഗങ്ങള്ക്കെതിരെ യുട്യൂബിലൂടെ അശ്ലീല പരാമര്ശം നടത്തിയ കോടതി ജീവനക്കാരന് അറസ്റ്റില്. കൊല്ലം നഗരത്തിലെ ഹരിതകര്മ സേനയെ ആക്ഷേപിച്ച ചാവക്കാട് സബ് കോടതി ക്ലാര്ക്ക് തൃശൂര് മാടവന ആലംപറമ്പില് സിറാജുദ്ദീന് (52) ആണു കൊല്ലം ഈസ്റ്റ് പൊലീസിന്റെ പിടിയിലായത്. സൈബര് സെല്ലിന്റെ സഹായത്തോടെയാണ് പ്രതിയെ കണ്ടെത്തിയത്.
ഡിസംബര് 9ന് യുട്യൂബ് ചാനലില് വന്ന വാര്ത്തയുടെ കമന്റിലാണ് സേനാംഗങ്ങള്ക്കെതിരെ അശ്ലീല പരാമര്ശം നടത്തിയത്. കൊല്ലം കോര്പറേഷനു കീഴില് ജോലി ചെയ്യുന്ന സേനാംഗങ്ങള് ഇതില് പ്രതിഷേധിച്ച് പണി മുടക്കുകയും പ്രതിഷേധ മാര്ച്ച് നടത്തുകയും ചെയ്തിരുന്നു. പരാതി ലഭിച്ചതോടെ ഈസ്റ്റ് പൊലീസ് കേസെടുത്ത് അന്വേഷണം ആരംഭിച്ചു.
കേസെടുത്തതറിഞ്ഞതോടെ ഒളിവില് പോയ ഇയാള് കഴിഞ്ഞ ദിവസം രാത്രി പ്രതി വീട്ടിലെത്തിയിരുന്നു. വിവരം അറിഞ്ഞു സ്ഥലത്തെത്തിയ പൊലീസ് അറസ്റ്റ് ചെയ്തു. പോസ്റ്റ് ഇട്ട മൊബൈല് ഫോണ് കണ്ടെടുത്തിട്ടുണ്ട്. കൊല്ലം ഈസ്റ്റ് എസ് എച്ച് ഒ പുഷ്പകുമാര്, എസ്ഐ സരിത എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. പ്രതിയെ കോടതിയില് ഹാജരാക്കി റിമാന്ഡ് ചെയ്തു.
