തിരുവനന്തപുരം: റെക്കോഡ് വില്‍പ്പന നേടി സംസ്ഥാന ഭാഗ്യക്കുറിയുടെ ക്രിസ്മസ്- പുതുവത്സര ബമ്പര്‍ ടിക്കറ്റ്. ബുധനാഴ്ച ഉച്ചവരെ 51,66,810 ടിക്കറ്റുകളാണ് വിറ്റുപോയത്. കഴിഞ്ഞവര്‍ഷത്തെ ക്രിസ്മസ്-പുതുവത്സര ബമ്പര്‍ ടിക്കറ്റുകളുടെ വില്‍പ്പന 47,65,650 ആയിരുന്നു. നറുക്കെടുപ്പിനു ദിവസങ്ങള്‍ ശേഷിക്കേ ആവശ്യക്കാരുടെ എണ്ണം കൂടിവരുന്നതിനാല്‍ അഞ്ചു ലക്ഷം ടിക്കറ്റുകള്‍കൂടി വിപണിയിലെത്തിച്ചു. 20 കോടി രൂപയാണ് ഒന്നാംസമ്മാനം.

രണ്ടാം സമ്മാനം ഒരുകോടി രൂപവീതം 20 പേര്‍ക്കും മൂന്നാം സമ്മാനമായി 10 ലക്ഷം രൂപവീതം 20 പേര്‍ക്കും നാലാം സമ്മാനമായി മൂന്നു ലക്ഷം രൂപവീതം 20 പേര്‍ക്കും അഞ്ചാം സമ്മാനമായി രണ്ടു ലക്ഷം രൂപവീതം 20 പേര്‍ക്കും ലഭിക്കും.

ടിക്കറ്റഇന് കൂടുതല്‍ വില്‍പ്പന നടന്നത് പാലക്കാട് ജില്ലയിലാണ്. ഇതുവരെ 12,20,520 ടിക്കറ്റുകളാണ് വിറ്റത്. രണ്ടാമതുള്ള തൃശ്ശൂരില്‍ 5,44,340 ടിക്കറ്റ് വിറ്റു. മൂന്നാമതുള്ള തിരുവനന്തപുരത്ത് 5,15,090 ടിക്കറ്റുകളുടെ വില്‍പ്പന നടന്നു. കഴിഞ്ഞതവണ നാലാംസ്ഥാനത്തുണ്ടായിരുന്ന എറണാകുളത്തിനെ അട്ടിമറിച്ച് 3,34,910 ടിക്കറ്റുകള്‍ വിറ്റ കൊല്ലം നാലാമതും 3,11,780 ടിക്കറ്റുകളുടെ വില്‍പ്പനയോടെ കണ്ണൂര്‍ അഞ്ചാമതുമാണ്.

പത്ത് സീരീസുകളിലായുള്ള ടിക്കറ്റില്‍ ബമ്പര്‍ സമ്മാനം ലഭിക്കാതെപോയ മറ്റ് ഒന്‍പത് സീരീസിനായി ഒരു ലക്ഷം രൂപ വീതമുള്ള സമാശ്വാസ സമ്മാനങ്ങള്‍ ഉണ്ടാകും. 5000, 2000, 1000, 500, 400 വീതം രൂപ സമ്മാനങ്ങളും ഉള്‍പ്പെടെ ആകെ 6,21,990 സമ്മാനങ്ങള്‍ ലഭിക്കും.

ക്രിസ്മസ്- പുതുവത്സര ബമ്പര്‍ ടിക്കറ്റ്റെക്കോര്‍ഡ് വില്‍പ്പന

സ്വന്തം ലേഖകൻ