ശിക്ഷ അനുഭവിക്കാന് പ്രതി ജീവനോടെ ഉണ്ടാകണം; ജ്യോതി ബാബുവിന്റെ ജാമ്യാപേക്ഷയില് മെഡിക്കല് ബോര്ഡ് രൂപീകരിക്കാന് സുപ്രീം കോടതി
ന്യൂഡല്ഹി: ടി.പി. ചന്ദ്രശേഖരന് വധക്കേസിലെ പ്രതി ജ്യോതി ബാബുവിന്റെ ജാമ്യാപേക്ഷയില് മെഡിക്കല് ബോര്ഡ് രൂപീകരിക്കാന് സുപ്രീം കോടതി നിര്ദ്ദേശം നല്കി. ജ്യോതി ബാബുവിന്റെ ആരോഗ്യനില പരിശോധിച്ച ശേഷം ഏഴ് ദിവസത്തിനകം റിപ്പോര്ട്ട് സമര്പ്പിക്കാനാണ് കോടതി ആവശ്യപ്പെട്ടത്. ഈ റിപ്പോര്ട്ട് ലഭിച്ച ശേഷം പ്രതിക്ക് ഇടക്കാല ജാമ്യം അനുവദിക്കുന്ന കാര്യം പരിഗണിക്കുമെന്ന് കോടതി വ്യക്തമാക്കി.
വൃക്ക മാറ്റിവെക്കല് ശസ്ത്രക്രിയയുമായി ബന്ധപ്പെട്ട റിപ്പോര്ട്ട് നല്കാന് കണ്ണൂര് ഗവണ്മെന്റ് മെഡിക്കല് കോളേജ് അധികൃതര്ക്കാണ് സുപ്രീം കോടതി നിര്ദ്ദേശം നല്കിയത്. പ്രതിക്ക് ശസ്ത്രക്രിയ അനിവാര്യമാണോ എന്നും വൃക്ക നല്കാന് ദാതാവിനെ കണ്ടെത്തിയോ എന്നും കോടതി ചോദിച്ചു. പ്രതിയുടെ ആരോഗ്യകാര്യത്തില് കൃത്യമായ വിവരം ലഭിക്കേണ്ടതുണ്ടെന്നും അതിനായി അഞ്ചു വിദഗ്ധ ഡോക്ടര്മാര് അടങ്ങുന്ന ബോര്ഡ് രൂപീകരിക്കണമെന്നും കോടതി നിര്ദ്ദേശിച്ചു.
ശിക്ഷ അനുഭവിക്കാന് പ്രതിയായ വ്യക്തി ജീവനോടെ ഉണ്ടാകണമെന്ന് ഉറപ്പുവരുത്തേണ്ടതുണ്ടെന്ന് ബെഞ്ച് നിരീക്ഷിച്ചു. ആരോഗ്യനില അതീവ ഗുരുതരമാണെന്ന പ്രതിഭാഗത്തിന്റെ വാദത്തിന്റെ അടിസ്ഥാനത്തിലാണ് കോടതിയുടെ ഈ ഇടപെടല്. ആരോഗ്യകാരണങ്ങളാല് ജാമ്യം വേണമെന്ന ഹര്ജിയില് മെഡിക്കല് റിപ്പോര്ട്ട് ലഭിച്ചാലുടന് അന്തിമ തീരുമാനമെടുക്കും.
