ശബരമല സ്വര്ണ്ണക്കൊള്ള: 'അന്വേഷണം സത്യനിഷ്ഠം', പ്രതിപക്ഷത്തിന് ഹൈക്കോടതിയുടെ കൊട്ട്; സതീശന് മിണ്ടാത്തതെന്തെന്ന് പി. രാജീവ്
തിരുവനന്തപുരം: ശബരിമല സ്വര്ണ്ണക്കൊള്ളക്കേസില് അങ്ങേയറ്റം സത്യനിഷ്ഠമായ അന്വേഷണമാണ് നടക്കുന്നതെന്ന് ഹൈക്കോടതി ഡിവിഷന് ബെഞ്ച് തന്നെ വ്യക്തമാക്കിയ സാഹചര്യത്തില്, പ്രതിപക്ഷത്തിന്റെ ആരോപണങ്ങള് രാഷ്ട്രീയ നാടകമാണെന്ന് മന്ത്രി പി. രാജീവ്. അന്വേഷണം ശരിയായ ദിശയിലാണെന്ന് കോടതി പൂര്ണ്ണ സംതൃപ്തി രേഖപ്പെടുത്തിയിട്ടും അത് കേട്ടഭാവം നടിക്കാന് പ്രതിപക്ഷ നേതാവ് വി.ഡി. സതീശന് തയ്യാറാകുന്നില്ലെന്നും മന്ത്രി പത്രസമ്മേളനത്തില് കുറ്റപ്പെടുത്തി.
അടിസ്ഥാനരഹിതമായ റിപ്പോര്ട്ടുകള് പ്രചരിപ്പിച്ച് പ്രത്യേക അന്വേഷണ സംഘത്തെ സമ്മര്ദ്ദത്തിലാക്കാന് ചിലര് ശ്രമിക്കുന്നുണ്ടെന്ന് കോടതി നിരീക്ഷിച്ചിരുന്നു. പേരെടുത്ത് പറഞ്ഞില്ലെങ്കിലും അത് വി.ഡി. സതീശനെ ഉദ്ദേശിച്ചാണെന്ന് നിഴല് പോലെ വ്യക്തമാണ്. മുഖ്യമന്ത്രിയുടെ ഓഫീസിലെ ഉദ്യോഗസ്ഥര് അന്വേഷണത്തില് ഇടപെടുന്നു എന്ന പ്രതിപക്ഷത്തിന്റെ വാദം വെറും പുകമറയാണ്. ഈ ഉദ്യോഗസ്ഥരെ ഉള്പ്പെടുത്തിയത് ഹൈക്കോടതി അംഗീകരിച്ചതാണെന്നും മന്ത്രി ഓര്മ്മിപ്പിച്ചു.
കോടതിയില് സമര്പ്പിച്ച പ്രോഗ്രസ് റിപ്പോര്ട്ട് ആഴത്തില് പരിശോധിച്ച ശേഷമാണ് അന്വേഷണം തൃപ്തികരമാണെന്ന് കോടതി പറഞ്ഞത്. ഹൈക്കോടതി നേരിട്ട് നിയമിച്ച സംഘത്തെ അവിശ്വസിക്കുന്നതിലൂടെ പ്രതിപക്ഷം കോടതിയെത്തന്നെയാണ് ചോദ്യം ചെയ്യുന്നത്. തങ്ങള് പറയുന്നത് കേട്ടില്ലെങ്കില് അന്വേഷണ ഉദ്യോഗസ്ഥരുടെ പേര് പറയുമെന്ന് വിരട്ടുന്ന സതീശന് യഥാര്ത്ഥത്തില് അന്വേഷണം അട്ടിമറിക്കാനാണ് ശ്രമിക്കുന്നതെന്നും മന്ത്രി പി. രാജീവ് പറഞ്ഞു.
