പെരുമ്പാവൂരില് മലയാളികളടക്കം 27 എയ്ഡ്സ് രോഗികള്? ജാഗ്രത നടപടികളുമായി ആരോഗ്യവകുപ്പ്
കൊച്ചി: എറണാകുളം പെരുമ്പാവൂരില് എയ്ഡ്സ് രോഗികള് വര്ധിക്കുന്ന സാഹചര്യത്തില് മെഗാ മെഡിക്കല് ക്യാമ്പ് സംഘടിപ്പിക്കും. ഫെബ്രുവരി 22നാണ് ക്യാമ്പ്. ആരോഗ്യ ഉത്സവം എന്ന പേരില് നടത്തുന്ന ക്യാമ്പില് പരമാവധി അന്യസംസ്ഥാന തൊഴിലാളികളെ പങ്കെടുപ്പിക്കാനും സമഗ്ര ആരോഗ്യ പരിപാലനവുമായി ബന്ധപ്പെട്ട ബോധവത്കരണവും മെഡിക്കല് ചെക്കപ്പും നടത്താനും തീരുമാനിച്ചിട്ടുണ്ട്.
പെരുമ്പാവൂരില് പത്തു മലയാളികളും സ്ത്രീകളും അടക്കം 27 പേര്ക്ക് എയ്ഡ്സ് സ്ഥിരീകരിച്ചതായാണ് പെരുമ്പാവൂര് താലൂക്കിലെ ആരോഗ്യവകുപ്പ് വിഭാഗം നല്കുന്ന കണക്ക്. എന്നാല്, രോഗികള് ക്രമാതീതമായി വര്ധിക്കുന്നില്ല എന്നാണ് സംസ്ഥാന എയ്ഡ്സ് നിയന്ത്രണ സൊസൈറ്റി ചൂണ്ടിക്കാട്ടുന്നത്. അതേസമയം, അന്യസംസ്ഥാന തൊഴിലാളികള്ക്കിടയില് എയ്ഡ്സ് രോഗം വര്ധിക്കുന്നുവെന്ന വാര്ത്തകളുടെ അടിസ്ഥാനത്തില് പെരുമ്പാവൂരില് സംസ്ഥാന എയ്ഡ്സ് നിയന്ത്രണ സൊസൈറ്റി പ്രോജക്ട് ഡയറക്ടര് പിയൂഷ് എം. നമ്പൂതിരിപ്പാടിന്റെ നേതൃത്വത്തില് കഴിഞ്ഞ ദിവസം കൊച്ചിയില് അവലോകനയോഗം ചേര്ന്നിരുന്നു. ആരോഗ്യം, വനിത-ശിശു ക്ഷേമം, തൊഴില്, നിയമം ഉള്പ്പെടെയുള്ള വകുപ്പുകളിലെ ഉദ്യോഗസ്ഥര് യോഗത്തില് പങ്കെടുത്തിരുന്നു.
