ഉത്സവത്തിനിടെ സംഘര്ഷം; ഗാനമേള ട്രൂപ്പിന്റെ ഉപകരണങ്ങള് തല്ലിത്തകര്ത്തു
തിരുവനന്തപുരം: ഉത്സവത്തോടനുബന്ധിച്ചു നടന്ന ഗാനമേളയ്ക്കിടെയുണ്ടായ സംഘര്ഷത്തില് ലക്ഷങ്ങള് വിലവരുന്ന സംഗീത ഉപകരണങ്ങള് തകര്ത്തു. വട്ടപ്പാറ നമ്പാടില് ശനിയാഴ്ച രാത്രിയാണ് നാടിനെ നടുക്കിയ സംഭവം അരങ്ങേറിയത്. അക്രമത്തില് ഗാനമേള ട്രൂപ്പിന്റെ ഉപകരണങ്ങള്ക്കും സംഘാടകരുടെ വാഹനങ്ങള്ക്കും കടുത്ത നാശനഷ്ടങ്ങള് സംഭവിച്ചു.
മദ്യപിച്ചെത്തിയ ഒരു സംഘം യുവാക്കള് ഗാനമേളയ്ക്കിടെ സ്റ്റേജിന് മുന്നില് നൃത്തം ചെയ്യാന് ശ്രമിച്ചതാണ് പ്രശ്നങ്ങള്ക്ക് തുടക്കമിട്ടത്. ഇത് സംഘാടകര് തടഞ്ഞതോടെ യുവാക്കള് പ്രകോപിതരായി. ഗാനമേള അവസാനിച്ചതിന് പിന്നാലെ സംഘടിച്ചെത്തിയ അക്രമിസംഘം സ്പീക്കറുകളും മറ്റ് വിലപിടിപ്പുള്ള ഉപകരണങ്ങളും അടിച്ചുതകര്ക്കുകയായിരുന്നു. സമീപത്ത് പാര്ക്ക് ചെയ്തിരുന്ന സംഘാടകരുടെ വാഹനങ്ങളുടെ ചില്ലുകളും ഇവര് തകര്ത്തു.
അക്രമം നടക്കുമ്പോള് സംഭവസ്ഥലത്ത് പോലീസുകാര് ഉണ്ടായിരുന്നിട്ടും അവര് ഇടപെട്ടില്ലെന്ന് സംഘാടകര് പരാതിപ്പെട്ടു. അക്രമികളെ തടയാനോ ഉപകരണങ്ങള് സംരക്ഷിക്കാനോ പോലീസ് തയ്യാറായില്ലെന്നാണ് ആക്ഷേപം. സംഭവത്തില് വട്ടപ്പാറ പോലീസ് കേസെടുത്തിട്ടുണ്ടെങ്കിലും പ്രതികളെ ആരെയും ഇതുവരെ പിടികൂടാനായിട്ടില്ല. ലക്ഷങ്ങളുടെ നഷ്ടം സംഭവിച്ച ട്രൂപ്പിന് നീതി ലഭിക്കണമെന്ന ആവശ്യവുമായി കലാകാരന്മാരും രംഗത്തെത്തിയിട്ടുണ്ട്.
