വിതുര കല്ലാറില് യു.ഡി.എഫ് തെരഞ്ഞെടുപ്പ് കമ്മിറ്റി ഓഫീസ് അടിച്ചു തകര്ത്തു; പ്രവര്ത്തകരെ മര്ദ്ദിച്ചു; ആറ് പേര് കസ്റ്റഡിയില്
നെടുമങ്ങാട്: വിതുര കല്ലാറില് യു.ഡി.എഫ് സ്ഥാനാര്ഥി വി.എസ്. ശിവകുമാറിന്റെ തെരഞ്ഞെടുപ്പ് കമ്മിറ്റി ഓഫീസിനുനേരെ ആക്രമണം. പൊന്മുടി സന്ദര്ശിച്ച് മടങ്ങി വന്ന ഒരു സംഘം ആളുകള് ഓഫീസിന് നേരെ നടത്തിയ അപ്രതീക്ഷിത ആക്രമണത്തില് സ്ത്രീകള് ഉള്പ്പെടെ പത്തു പേര്ക്കാണ് പരിക്കേറ്റത്. അക്രമം തടയാന് ശ്രമിച്ചവര്ക്കും ഓഫീസ് പരിസരത്ത് ഉണ്ടായിരുന്നവര്ക്കും മര്ദനമേറ്റു.
തലയ്ക്ക് ഗുരുതരമായി പരിക്കേറ്റ രാധാകൃഷ്ണന് (47) എന്നയാളെ വിദഗ്ധ ചികിത്സയ്ക്കായി ആശുപത്രിയില് പ്രവേശിപ്പിച്ചു. കല്ലാര് സ്വദേശികളായ നജീം. എ (53), കരീം. എം (73), ഷാജഹാന്. എം (58), അനില് കുമാര്. കെ (49), സത്യന്. എസ് (70), സീനത്ത്. എസ് (60), ആരിഫ. കെ (75), റംല. കെ (70), മായ. പി (45) എന്നിവര്ക്കാണ് പരിക്കേറ്റ മറ്റ് ആളുകള്. പരിക്കേറ്റവരില് അധികവും മുതിര്ന്ന പൗരന്മാരാണെന്നത് സംഭവത്തിന്റെ ഗൗരവം വര്ദ്ധിപ്പിക്കുന്നു.
തിരുവനന്തപുരം വഞ്ചിയൂര് സ്വദേശികളായ സി.പി.എം പ്രവര്ത്തകരാണ് ആക്രമണത്തിന് പിന്നിലെന്ന് പരിക്കേറ്റവര് ആരോപിച്ചു. വാഹനത്തില് എത്തിയ സംഘം ഓഫീസിന് മുന്നില് വാഹനം നിര്ത്തുകയും യാതൊരു പ്രകോപനവുമില്ലാതെ അസഭ്യം പറയുകയും ഓഫീസിനുള്ളിലേക്ക് അതിക്രമിച്ചു കയറി ആക്രമണം നടത്തുകയുമായിരുന്നു എന്നാണ് ലഭിക്കുന്ന വിവരം. ഓഫീസിലെ ഫര്ണിച്ചറുകളും മറ്റും സംഘം അടിച്ചുതകര്ത്തു.
അക്രമത്തിന് ശേഷം സ്ഥലത്തുനിന്ന് കടന്നുകളഞ്ഞ സംഘത്തെ ആനപ്പാറയില് വെച്ച് നാട്ടുകാരും പ്രവര്ത്തകരും തടയാന് ശ്രമിച്ചു. ഇവിടെ വെച്ചും സംഘം വീണ്ടും അക്രമത്തിന് മുതിര്ന്നത് സംഘര്ഷാവസ്ഥ സൃഷ്ടിച്ചു. തുടര്ന്ന് സ്ഥലത്തെത്തിയ വിതുര പോലീസ് സംഘത്തിലെ ആറു പേരെ കസ്റ്റഡിയിലെടുത്തു. വഞ്ചിയൂര് സ്വദേശികളായ അഫ്സല്, അരുണ്, യദു, ശരത്, വിഷ്ണു, ഹാഷിം എന്നിവരാണ് ഇപ്പോള് പോലീസ് കസ്റ്റഡിയിലുള്ളത്.
തെരഞ്ഞെടുപ്പ് പ്രചാരണം സജീവമായി നടക്കുന്നതിനിടെയുണ്ടായ ഈ അക്രമം ജനാധിപത്യപരമായ പ്രവര്ത്തനങ്ങള്ക്ക് ഭീഷണിയാണെന്ന് യു.ഡി.എഫ് നേതൃത്വം ആരോപിച്ചു. അക്രമികളെ കര്ശനമായി നിയമത്തിന് മുന്നില് കൊണ്ടുവരണമെന്നും വരും ദിവസങ്ങളില് സമാധാനപരമായ പ്രചാരണത്തിന് സാഹചര്യം ഒരുക്കണമെന്നും ആവശ്യപ്പെട്ട് പ്രവര്ത്തകര് രംഗത്തെത്തിയിട്ടുണ്ട്. സംഭവസ്ഥലത്ത് കൂടുതല് പോലീസിനെ വിന്യസിച്ച് സുരക്ഷ ശക്തമാക്കി.
