തെരഞ്ഞെടുപ്പ് ദിവസം ബൈക്കിലെത്തി ആക്രമണം; ആര് എസ് എസ് നേതാവിനെ വെട്ടിപരിക്കേല്പ്പിച്ചു; ലഹരി സംഘത്തിലെ രണ്ടുപേര് പിടിയില്
കോട്ടയം: ചങ്ങനാശേരി നഗരമധ്യത്തില് ഭീകരാന്തരീക്ഷം സൃഷ്ടിക്കുകയും ആര്.എസ്.എസ് നേതാവിനെ ആക്രമിക്കുകയും ചെയ്ത സംഭവത്തില് ലഹരി സംഘത്തിലെ രണ്ട് യുവാക്കളെ പോലീസ് അറസ്റ്റ് ചെയ്തു. ആലപ്പുഴ കാവാലം സ്വദേശി വിമല് മോന്, തിരുവല്ല സ്വദേശി സിയാദ് ഷാജി എന്നിവരെയാണ് ചങ്ങനാശേരി പോലീസ് പിടികൂടിയത്. തിരഞ്ഞെടുപ്പ് ദിവസം രാത്രിയില് ബൈക്കിലെത്തിയ പ്രതികള് നഗരത്തില് വടിവാള് വീശിയും പടക്കം എറിഞ്ഞും വലിയ രീതിയിലുള്ള പരിഭ്രാന്തി പരത്തിയിരുന്നു.
നഗരമധ്യത്തില് വെച്ച് നടന്ന അക്രമത്തിനിടയിലാണ് ആര്.എസ്.എസ് പ്രാദേശിക നേതാവായ ആര്. കൃഷ്ണരാജിന് വെട്ടേറ്റത്. ഗുരുതരമായി പരിക്കേറ്റ അദ്ദേഹത്തെ ഉടന് തന്നെ ആശുപത്രിയില് പ്രവേശിപ്പിച്ചു. ഈ ആക്രമണത്തിന് പിന്നില് രാഷ്ട്രീയമായ ലക്ഷ്യങ്ങളോ മുന്വൈരാഗ്യമോ ഉള്ളതായി പ്രാഥമിക അന്വേഷണത്തില് കണ്ടെത്താനായിട്ടില്ലെന്ന് പോലീസ് അറിയിച്ചു. പിടിയിലായവര് ലഹരിക്ക് അടിമകളാണെന്നും ലഹരി ഉപയോഗിച്ചതിനെത്തുടര്ന്നുണ്ടായ പ്രകോപനമാണ് അക്രമത്തിന് പിന്നിലെന്നുമാണ് പോലീസിന്റെ നിഗമനം.
തിരഞ്ഞെടുപ്പ് ദിവസമുണ്ടായ അക്രമം നാട്ടുകാര്ക്കിടയില് വലിയ ആശങ്കയുണ്ടാക്കിയിരുന്നു. നഗരത്തില് ലഹരി സംഘങ്ങളുടെ ശല്യം വര്ധിക്കുന്നതായി പരാതി ഉയര്ന്ന സാഹചര്യത്തില്, പോലീസ് നിരീക്ഷണം കര്ശനമാക്കാനാണ് അധികൃതരുടെ തീരുമാനം. അറസ്റ്റിലായ പ്രതികളെ കോടതിയില് ഹാജരാക്കി റിമാന്ഡ് ചെയ്തു. സംഭവത്തില് കൂടുതല് പേര്ക്ക് പങ്കുണ്ടോ എന്ന കാര്യത്തില് പോലീസ് അന്വേഷണം തുടരുകയാണ്.
