കൊച്ചി: തിരുവനന്തപുരത്ത് നടത്തിയ നാമജപയാത്രക്കെതിരെ കേസെടുത്ത സംഭവത്തിൽ ഹൈക്കോടതിയെ സമീപിച്ച് എൻഎസ്എസ്. നിയമപരമായി നിലനിൽക്കാത്ത കേസ് റദ്ദ് ചെയ്യണമെന്ന് ആവശ്യപ്പെട്ട് എൻഎസ്എസ് വൈസ് പ്രസിഡന്റ് സംഗീത് കുമാറാണ് ഹർജി നൽകിയത്. സ്പീക്കർ എ എൻ ഷംസീറിന്റെ മിത്ത് പരാമർശത്തിൽ പ്രതിഷേധിച്ചാണ് നാമജപയാത്ര നടത്തിയത്.
ഒന്നാം പ്രതിയായി സംഗീത് കുമാറും കണ്ടാലറിയുന്ന ആയിരത്തിലധികം പേരും കന്റോൺമെന്റ് പൊലീസ് തയ്യാറാക്കിയ പ്രതിപ്പട്ടികയിലുണ്ട്. ഓഗസ്റ്റ് രണ്ടിന് വൈകിട്ട് തിരുവനന്തപുരം പാളയം ഗണപതി ക്ഷേത്രത്തിൽ നിന്ന് പഴവങ്ങാടി ഗണപതി ക്ഷേത്രം വരെയായിരുന്നു നാമജപ ഘോഷയാത്ര നടത്തിയത്. ഇതേതുടർന്ന് ഒരുമണിക്കൂറോളം നേരം എംജി റോഡിൽ ഗതാഗതം സ്തംഭിച്ചിരുന്നു. പൊലീസ് നിർദ്ദേശം ലംഘിച്ച് അന്യായമായി സംഘം ചേർന്നു, മൈക്ക് സെറ്റ് പ്രവർത്തിപ്പിച്ചു, കാൽനടയാത്രക്കാർക്കും വാഹനഗതാഗതത്തിനും തടസ്സമുണ്ടാക്കി എന്നിവയുൾപ്പെടെയാണ് ഇവർക്കെതിരെ ചുമത്തിയിരിക്കുന്ന വകുപ്പുകൾ.
