അഞ്ച് ദിവസമുള്ള കുഞ്ഞിന് അമിത വാക്സിൻ നൽകിയ സംഭവം; നഴ്സിന് സസ്പെൻഷൻ; കുട്ടി കടുത്ത പനിയാൽ ജില്ലാ ആശുപത്രിയിൽ തീവ്രപരിചരണ വിഭാഗത്തിൽ
പാലക്കാട്: പാലക്കാട് പിരായിരി പ്രാഥമിക ആരോഗ്യ കേന്ദ്രത്തിൽ വാക്‌സീൻ മാറി കുത്തിവച്ച സംഭവത്തിൽ നഴ്‌സിനെ സർവീസിൽ നിന്ന് സസ്‌പെന്റ് ചെയ്തു. പ്രാഥമിക ആരോഗ്യ കേന്ദ്രത്തിലെ ജെപിഎച്ച്എൻ ചാരുതയെയാണ് അന്വേഷണ വിധേയമായി സസ്‌പെന്റ് ചെയ്തത്. ജില്ലാ മെഡിക്കൽ ഓഫീസർ നടത്തിയ പ്രാഥമിക അന്വേഷണത്തിൽ നഴ്സിന് കൈപ്പിഴ സംഭവിച്ചതായി ഇവർ മൊഴി നൽകിയതിന്റെ അടിസ്ഥാനത്തിലാണ് നടപടിയെടുത്തത്.
ജനിച്ച് അഞ്ച് ദിവസം മാത്രം പ്രായമായ കുഞ്ഞിനാണ് വാക്‌സീൻ മാറി നൽകിയത്. പള്ളിക്കുളം സ്വദേശികളായ ദമ്പതികളുടെ അഞ്ചുദിവസം പ്രായമായ ആൺകുഞ്ഞിനാണ് വാക്‌സീൻ മാറി കുത്തിവച്ചത്.
ബിസിജിയുടെ കുത്തിവപ്പ് എടുക്കുന്നതിനാണ് കുഞ്ഞിനെ പ്രാഥമിക ആരോഗ്യ കേന്ദ്രത്തിൽ എത്തിച്ചത്.എന്നാൽ 45 ദിവസം കഴിഞ്ഞ് നൽകേണ്ട വാക്‌സീനാണ് കുഞ്ഞിന് നൽകിയത്. ആശുപത്രി ജീവനക്കാർ തങ്ങളോട് മോശമായി പെരുമാറിയെന്നും ബന്ധുക്കൾ പറയുന്നു.
സംഭവത്തെ കുറിച്ച് ജില്ലാ മെഡിക്കൽ ഓഫീസർ അന്വേഷണം തുടങ്ങി. കുഞ്ഞ് പാലക്കാട് ജില്ലാ ആശുപത്രിയിൽ നിരീക്ഷണത്തിലാണ്. രണ്ടാം മാസത്തിൽ എടുക്കുന്ന പോളിയോ വാക്സിൻ, ഒന്നരമാസത്തിൽ എടുക്കേണ്ട റോട്ട വാക്സിൻ, പിസിവി, ഐപിവി ഉൾപ്പടെയുള്ള വാക്സിനുകളാണ് കുട്ടിക്ക് നൽകിയത്. കുഞ്ഞ് ആശുപത്രിയിൽ ചികിത്സയിൽ തുടരുകയാണ്.
