'ഓണം ആഘോഷിക്കാൻ ഇറങ്ങുമ്പോൾ കരുതൽ വേണം..'; ട്രാഫിക് നിയമങ്ങൾ ഉറപ്പായും പാലിക്കണം; മുന്നറിയിപ്പുമായി റോഡ് സുരക്ഷാ അതോറിറ്റി

തിരുവനന്തപുരം: ഓണം ആഘോഷങ്ങളുടെ പശ്ചാത്തലത്തിൽ റോഡ് സുരക്ഷ ഉറപ്പാക്കണമെന്ന് റോഡ് സുരക്ഷാ അതോറിറ്റി മുന്നറിയിപ്പ് നൽകി. കഴിഞ്ഞ ഓണക്കാലത്ത് മാത്രം റോഡപകടങ്ങളിൽ 161 പേർ മരിക്കുകയും 1261 പേർക്ക് പരിക്കേൽക്കുകയും ചെയ്തതിനെത്തുടർന്നാണ് ഈ ഓർമ്മപ്പെടുത്തൽ.

കഴിഞ്ഞ വർഷത്തെ പത്ത് ദിവസത്തെ ഓണത്തോടനുബന്ധിച്ച് നടന്ന ആഘോഷവേളകളിൽ 1629 റോഡപകടങ്ങളുണ്ടായതായാണ് കണക്ക്. അപകടങ്ങൾ വർധിക്കുന്ന സാഹചര്യത്തിൽ, ഗതാഗത നിയമങ്ങൾ കർശനമായി പാലിക്കണമെന്ന് യാത്രക്കാർക്ക് നിർദ്ദേശം നൽകിയിട്ടുണ്ട്. പിഴയേക്കാൾ വലുത് ജീവനാണെന്ന് ഓർമ്മിപ്പിച്ച്, ഹെൽമെറ്റും സീറ്റ് ബെൽറ്റും നിർബന്ധമായും ഉപയോഗിക്കണം.

വാഹനങ്ങൾ ഓടിക്കുമ്പോൾ ലൈൻ ട്രാഫിക് പാലിക്കണം. അമിതവേഗതയും അശ്രദ്ധമായ ഓവർടേക്കിംഗും ഒഴിവാക്കണം. ലഹരി ഉപയോഗിച്ച് വാഹനം ഓടിക്കുന്നത് അതീവ ഗൗരവകരമായ വിഷയമാണെന്നും, ഇത് പൂർണ്ണമായും ഉപേക്ഷിക്കണമെന്നും അതോറിറ്റി അഭ്യർത്ഥിച്ചു.