അമ്മയ്ക്ക് സമീപം ഉറങ്ങുകയായിരുന്ന കുഞ്ഞിനെ മരിച്ച നിലയിൽ കണ്ടെത്തി; രാത്രി നിർത്താതെ കരഞ്ഞപ്പോൾ പാൽ കുടിച്ചിരുന്നതായും ബന്ധുക്കൾ; ദാരുണ സംഭവം കോഴിക്കോട്
കോഴിക്കോട്: അമ്മയുടെ സമീപം ഉറങ്ങുകയായിരുന്ന കുഞ്ഞിനെ മരിച്ച നിലയിൽ കണ്ടെത്തി. അമ്മയോടൊപ്പം ഉറങ്ങിക്കിടന്ന ഒന്നര മാസം പ്രായമുള്ള കുഞ്ഞിനെയാണ് ജീവനറ്റ നിലയിൽ കണ്ടെത്തിയത്. കുറ്റ്യാടി കക്കട്ടില്‍ ആണ് സംഭവം നടന്നത്.അരൂര്‍ ഒതയോത്ത് സ്വദേശി റിയാസിന്റെ മകള്‍ നൂറ ഫാത്തിമയാണ് ദാരുണമായി മരിച്ചത്.
കക്കട്ടില്‍ പൊയോല്‍മുക്ക് സ്വദേശിനിയായ അമ്മയുടെ വീട്ടിലാണ് സംഭവം നടന്നത്. തിങ്കളാഴ്ച രാവിലെ 10 മണിയോടെ റിയാസിന്റെ മൂത്ത മകള്‍ കുഞ്ഞിന് സമീപം എത്തിയപ്പോഴാണ് മരിച്ച നിലയില്‍ കണ്ടെത്തുന്നത്.
ഈ സമയം കുഞ്ഞിന് സമീപം ഉറങ്ങുകയായിരുന്നു അമ്മ. ഉടനെ തന്നെ അടുത്തുളള ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാൻ സാധിച്ചില്ല. റിയാസിന്റെ പരാതിയില്‍ കുറ്റ്യാടി പോലീസ് കേസെടുത്തു. സംഭവിച്ചത് എന്താണെന്ന് അറിയില്ലെന്നും ഇന്നലെ രാത്രി നിര്‍ത്താതെ കരഞ്ഞ കുഞ്ഞ് പുലര്‍ച്ചെ രണ്ട് മണി വരെ പാല്‍ കുടിച്ചിരുന്നതായും ബന്ധുക്കള്‍ പറയുന്നു. സംഭവത്തിൽ അന്വേഷണം നടക്കുന്നതായി പോലീസ് പറഞ്ഞു.
