ആലപ്പുഴയിൽ എഎസ്ഐ യുടെ മൃതദേഹം കടപ്പുറത്ത് കണ്ടെത്തി; കരയ്ക്കടിഞ്ഞത് ഇന്നലെ വൈകിട്ട് വരെ എ.ആർ ക്യാമ്പിൽ ഡ്യൂട്ടിയിലുണ്ടായിരുന്ന ഫെബി ഗോൺസാലസിന്റെ മൃതദേഹം; ആത്മഹത്യയെന്ന പ്രാഥമിക നിഗമനത്തിൽ പൊലീസ്

ആലപ്പുഴ :ഇന്നലെ വൈകിട്ട് വരെ ഡ്യൂട്ടിയിലുണ്ടായിരുന്ന ആലപ്പുഴ എ.ആർ ക്യാമ്പിലെ എഎസ്ഐ യുടെ മൃതദേഹം കടപ്പുറത്ത് നിന്നും കണ്ടെത്തി.ആലപ്പുഴ കടപ്പുറത്താണ് പൊലീസ് ഉദ്യോഗസ്ഥന്റെ മൃതദേഹം കരക്കടിഞ്ഞത്.എ ആർ ക്യാമ്പിലെ എഎസ്‌ഐ ഫെബി ഗോൺസാലസിന്റെ മൃതദേഹമാണ് കണ്ടെത്തിയിരിക്കുന്നത്.ആലപ്പുഴ കാഞ്ഞിരംചിറ സ്വദേശിയാണ് ഫെബി ഗോൺസാലസ്.

ഇന്ന് രാവിലെ 8.30 ഓടെയാണ് മൃതദേഹം ആലപ്പുഴ കടപ്പുറത്ത് അടിഞ്ഞത്.പിന്നീട് പൊലീസ് എത്തി പരിശോധിച്ചപ്പോഴാണ് മൃതദേഹം ഫെബി ഗോൺസാലസിന്റെതാണെന്ന് തിരിച്ചറിഞ്ഞത്.പൊലീസ് ഇൻക്വസ്റ്റ് നടത്തുകയാണ്.ഗോൺസാലസിന്റേത് ആത്മഹത്യയാണെന്നാണ് പ്രാഥമിക നിഗമനം.ക്യാമ്പിലെന്തെങ്കിലും പ്രശ്‌നം ഉള്ളതായി അറിയില്ലെന്നാണ് ക്യാമ്പ് കമാന്റന്റ് അറിയിച്ചത്.മൃതദേഹത്തിൽ പരിക്കുകളില്ല.അതേ സമയം ആത്മഹത്യ ചെയ്യാനുള്ള സാഹചര്യമോ കാരണമോ എന്തെന്ന് ഇതുവരെയും വ്യക്തമായിട്ടില്ല.