സ്വകാര്യബസിൽ നിന്നും തെറിച്ചുവീണ് അപകടം; വിദ്യാർത്ഥിനിക്ക് ഗുരുതര പരിക്ക്; ബസിനേയും ജീവനക്കാരെയും കസ്റ്റഡിയിലെടുത്തു; സംഭവം കൊട്ടാരക്കരയിൽ
കൊല്ലം: സ്വകാര്യ ബസ്സിൽ നിന്നും തെറിച്ചു വീണ് വിദ്യാർഥിനിക്ക് ഗുരുതര പരിക്ക്.കൊട്ടാരക്കര പുത്തൂരിലാണ് അപകടം നടന്നത്. കൊട്ടാരക്കര മാർത്തോമാ ഗേൾസ് ഹൈസ്കൂളിലെ വിദ്യാർഥിനിക്കാണ് പരിക്ക് പറ്റിയത്. പരിക്കേറ്റ കുട്ടിയെ സ്വകാര്യ ആശുപത്രിയിൽ പ്രവേശിപ്പിച്ചിട്ടുണ്ട്. അപകടം ഉണ്ടാക്കിയതിനെ തുടർന്ന് സ്വകാര്യ ബസും രണ്ട് ജീവനക്കാരെയും പുത്തൂർ പോലീസ് കസ്റ്റഡിയിലെടുത്തിട്ടുണ്ട്.
രാവിലെ ഒന്‍പതരയോടെയാണ് അപകടം നടന്നത്. പൂത്തൂര്‍ കല്ലുംമൂട്ടില്‍ നിന്നുമാണ് വിദ്യാര്‍ത്ഥി സ്വകാര്യ ബസില്‍ കയറിയത്. ഡോറിന് അടുത്തായി നിന്ന വിദ്യാര്‍ത്ഥിനി തെറിച്ച് വീഴുകയായിരുന്നു. ആ സമയം ബസിൽ നല്ല തിരക്കുണ്ടായിരുന്നു.
റോഡിലേക്ക് തെറിച്ചു വീണതിനെ തുടര്‍ന്ന് വിദ്യാര്‍ത്ഥിനിയുടെ തലയ്ക്ക് ഗുരുതരമായി പരിക്കേറ്റിട്ടുണ്ട്. ബസിൽ ഡ്രൈവര്‍ക്ക് തുറക്കാന്‍ സാധിക്കുന്ന ഓട്ടോമാറ്റിക്ക് ഡോറാണ് ഉള്ളത്. അപകടത്തിന് കാരണം ഇതുവരെ വ്യക്തമായിട്ടില്ല. ബസ് ജീവനക്കാരെയും ബസും പോലീസ് കസ്റ്റഡിയിലെടുത്തിട്ടുണ്ട്.
