കേരളത്തില്‍ അടുത്ത ദിവസങ്ങളില്‍ ഇടിമിന്നലോടുകൂടിയ മഴയ്ക്കും ശക്തമായ കാറ്റിനും സാധ്യത; മൂന്ന് ജില്ലകള്‍ക്ക് യെല്ലോ അലേര്‍ട്ട്; മത്സ്യത്തൊഴിലാളികള്‍ക്കും നിര്‍ദേശം
തിരുവനന്തപുരം: കേരളത്തില്‍ അടുത്ത ദിവസങ്ങളില്‍ ഇടിമിന്നലോടുകൂടിയ മഴയ്ക്കും ശക്തമായ കാറ്റിനും സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ്. ചില ജില്ലകളില്‍ ഒറ്റപ്പെട്ടയിടങ്ങളില്‍ ശക്തമായ മഴ ലഭിക്കാനിടയുണ്ടെന്ന് അറിയിപ്പില്‍ പറയുന്നു.
പത്തനംതിട്ട, ഇടുക്കി ജില്ലകള്‍ക്കാണ് യെല്ലോ അലര്‍ട്ട് പ്രഖ്യാപിച്ചിരിക്കുന്നത്. തിരുവനന്തപുരം, കൊല്ലം, ആലപ്പുഴ, കോട്ടയം, എറണാകുളം, തൃശൂര്‍ എന്നീ ജില്ലകളിലും ഇടിമിന്നലോട് കൂടിയ ചെറിയതോതിലുള്ള മഴ പെയ്യാന്‍ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. മണിക്കൂറില്‍ 40 കിലോമീറ്റര്‍ വരെ വേഗതയുള്ള കാറ്റിനും സാധ്യത ഉണ്ട്.
അതേസമയം, അറബിക്കടലിലെ വിവിധ മേഖലകളില്‍ ശക്തമായ കാറ്റും ചുഴലിക്കാറ്റ് സ്വഭാവമുള്ള കാലാവസ്ഥയും തുടരാനാണ് സാധ്യത. മധ്യ പടിഞ്ഞാറന്‍ അറബിക്കടലിന്റെ വടക്ക് കിഴക്കന്‍ ഭാഗങ്ങളില്‍ മണിക്കൂറില്‍ 90 മുതല്‍ 120 കിലോമീറ്റര്‍ വരെ വേഗതയില്‍ കാറ്റ് വീശാമെന്നാണ് മുന്നറിയിപ്പ്.
മത്സ്യബന്ധനത്തിനായി കടലില്‍ പോകുന്നത് പൂര്‍ണമായും ഒഴിവാക്കണമെന്ന് അധികൃതര്‍ ആവശ്യപ്പെട്ടു. വടക്കന്‍, മധ്യ, പടിഞ്ഞാറന്‍ അറബിക്കടല്‍ മേഖലകളിലാകെ 45 മുതല്‍ 65 കിലോമീറ്റര്‍ വരെ വേഗതയിലുള്ള കാറ്റും മോശം കാലാവസ്ഥയും നിലനില്‍ക്കാമെന്ന് കാലാവസ്ഥാ വകുപ്പ് മുന്നറിയിപ്പ് നല്‍കി.
