ഷാർജ: ടൂറിസം വകുപ്പ് മന്ത്രി പി എ മുഹമ്മദ് റിയാസിന്റെ 'കേരള ടൂറിസം: ചരിത്രവും വർത്തമാനവും' എന്ന പുസ്തകത്തിന് ആമുഖമെഴുതി നടൻ മോഹൻലാൽ. 'കേരള ടൂറിസം: ചരിത്രവും വർത്തമാനവും' എന്ന പുസ്തകം ഷാർജ അന്താരാഷ്ട്ര പുസ്തകോത്സവത്തിലാണ് പ്രകാശനം ചെയ്തത്. 168 പേജുള്ള പുസ്തകത്തിൽ കേരളത്തിന്റെ വിനോദസഞ്ചാര സാധ്യതകൾ പരിപോഷിപ്പിക്കാൻ വേണ്ടി നടപ്പാക്കിയ പ്രവർത്തനങ്ങളെക്കുറിച്ച് വിവരിക്കുന്നു.
അനന്തമായ വിനോദ സഞ്ചാര സാധ്യതകളുള്ള കേരളത്തെ എങ്ങനെ കൂടുതൽ ആകർഷകമായ രീതിയിൽ വികസിപ്പിക്കാം എന്നതിനെക്കുറിച്ചുള്ള ശ്രദ്ധേയ നിരീക്ഷണങ്ങൾ പുസ്തകം പങ്കുവയ്ക്കുന്നതായി മോഹൻലാൽ അവതാരികയിൽ കുറിച്ചു.
നാടിന്റെ ചരിത്രവും ഭൂമിശാസ്ത്രവും കാലാവസ്ഥയുമെല്ലാം മനസ്സിലാക്കി എങ്ങനെ വിജയകരമായ ഒരു വിനോദസഞ്ചാര പദ്ധതി ഉണ്ടാക്കാം എന്നതിനെക്കുറിച്ച് ഉത്തരവാദിത്തപ്പെട്ട സ്ഥാനത്തിരിക്കുന്ന ഗ്രന്ഥകാരന് നന്നായി അറിയാമെന്നും അത് സംസ്ഥാനത്ത് വിജയകരമായി നടപ്പാക്കിത്തുടങ്ങിയതായും മോഹൻലാൽ പറയുന്നു.
കേരള ടൂറിസത്തിന്റെ ഭൂതകാലത്തെയും വർത്തമാനത്തെയും കുറിച്ച് അവലോകനം നടത്തുന്ന പുസ്തകത്തിൽ മന്ത്രി എന്ന നിലയിലുള്ള ഗ്രന്ഥകർത്താവിന്റെ കഴിഞ്ഞ രണ്ടര വർഷത്തെ ഭരണാനുഭവങ്ങളും ഉണ്ട്.
